इटहरी रंगशालामा आगामी असार १३ गतेदेखि कोशी प्रदेश स्तरीय महिला फुटबल प्रतियोगिता आयोजना हुने भएको छ। महिला फुटबलको विकास र प्रवर्द्धन गर्ने उद्देश्यसहित इटहरी फुटबल क्लबले प्रतियोगिता सञ्चालन गर्न लागेको जनाएको छ।
असार २० गतेसम्म चल्ने प्रतियोगितामा राष्ट्रिय स्तरका ८ टोलीले प्रतिस्पर्धा गर्नेछन्। प्रतियोगिताका खेलहरू हरेक दिन दिउँसो ४:३० बजेबाट सुरु हुने आयोजकले जानकारी दिएको छ।
प्रतियोगिताको विजेता टोलीले दुई लाख रुपैयाँ नगद पुरस्कार प्राप्त गर्नेछ भने उपविजेताले एक लाख रुपैयाँ हात पार्नेछ। यस्तै, प्रतियोगिताको उत्कृष्ट खेलाडीलाई २५ हजार रुपैयाँ नगदसहित सम्मान गरिने व्यवस्था गरिएको छ।
कोशी प्रदेश फुटबल संघको सहयोग तथा कोशी प्रदेश खेलकुद विकास बोर्डको संयोजनमा आयोजना हुन लागेको प्रतियोगिताले महिला फुटबलप्रति बढ्दो आकर्षणलाई थप ऊर्जा प्रदान गर्ने विश्वास आयोजकको छ। स्थानीय स्तरदेखि राष्ट्रिय स्तरसम्म महिला खेलाडीलाई प्रतिस्पर्धात्मक अवसर सिर्जना गर्ने लक्ष्यसहित प्रतियोगिता सञ्चालन गर्न लागिएको बताइएको छ।
Copyright © 2019 / 2026 - Junkirikhabar.com All rights reserved
