प्रमुख प्रतिपक्ष दल नेपाली काँग्रेस निकट विद्यार्थी संगठन नेपाल विद्यार्थी संघ सुनसरीले इटहरीमा प्रर्दशन गरेको छ । भारतीय नक्सामा नेपाली भूमि समावेश गरिएपछि आक्रोशित हुँदै आएको नेविसंघले प्रधानमन्त्री केपी शर्मा ओली र भारतीय प्रधानमन्त्री नरेन्द्र मोदीको पुत्ला दहन गरेका हुन ।
ओली सरकार भारत प्रति लम्पसार परेको भन्दै सरकारविरुद्ध चर्का नाराबाजी पनि गरेका थिए । नेविसंघ सुनसरीका सभापति मन्दिप भट्टराईले राष्ट्रियताका लागि आफुहरु दैनिक सडकमा आन्दोलन गर्न तयार रहेको बताए ।
नेविसंघले भारतले आफ्नो नक्सामा समावेश गरेको कालापानी, लिपुलेक र लिम्पियाधुरा फिर्ता नलिएसम्म आफूहरुको आन्दोलन जारी रहने चेतावनी पनि दिँदै आएको छ । भारतले आफ्नो नक्सामा समावेश गरेको नेपाली भूमि फिर्ता नभएसम्म आफूहरुको आन्दोलन जारी रहने नेविसंघका सुनसरी सभापति भट्टराईले बताए । केन्द्रिय निर्देशन अनुसार आन्दोलनको कार्यक्रम भईरहेको उनको भनाई थियो ।
नेविसंघले भारत सरकारसँग नेपाली भूमि फिर्ता लिन माग गर्दै इटहरी लगायतका देशका मुख्यमुख्य सहरमा विरोध प्रर्दशन गर्दै आएको छ । विरोध कार्यक्रममा नेविसंघ सुनसरीका उपसभापतिहरु विक्रम घिमिरे,सुवेक्छु देवान,बुद्धहाङ लिम्बु लगायतको सहभागीतामा पुत्ला दहन भएको थियो ।
Copyright © 2019 / 2026 - Junkirikhabar.com All rights reserved
