अमेरिकी फौजी कीराले मकै बाली सखाप पार्न थालेपछि इलाम, पाँचथर र ताप्लेजुङका कृषक चिन्तित बनेका छन्। इलाम नगरपालिका–१० भण्डारीवेसीका दुर्गा कुँवरले २२ रोपनी क्षेत्रमा मकै लगाएका छन्। उनले लगाएको मकैमा एक साता अघिदेखि देखिएको फौजी किराले पचास प्रतिशत मकै नस्ट गरिसकेको छ।
उनले सुनाए, ‘कृषि ज्ञान केन्द्रले विषादी लेखिदियो एग्रोभेटले विषादी छैन भनेपछि खालिहात फर्के।’ भण्डारीवेसीका १ सय भन्दा बढी कृषकको मकैवारीमा फौजी किराको प्रकोप देखिएको छ।
इलामको चुलाचुली गाउँपालिका, मांसेबुङ गाउँपालिका, माइ नगरपालिका र इलाम नगरपालिकाका किसान पनि सोही किराको प्रकोकका कारण चिन्तित छन्। इलामको साढे ५ सय हेक्टर मकैबारीमा फौजी किराको प्रकोप छ। गोड्ने बेला भएको मकैमा फौजी किराको प्रकोप बढि देखिएको कृषि ज्ञान केन्द्र इलामका प्रमुख सालिकराम भट्टराईले जानकारी दिए। केन्द्रले रोकथामका लागि स्थानीय तहका कृषि शाखामार्फत प्राविधिक सेवा प्रदान गरिरहेको छ।
चुलाचुली गाउँपालिकाको बुकुवा, आइतबारे, बाह्रगोठेलगायतका क्षेत्रमा प्रकोप बढेको कृषि शाखा प्रमुख अनिल शर्माले जानकारी दिए। चुलाचुली गाउँपालिकाले प्रभावित क्षेत्रका किसानलाई निःशुल्क विषादी वितरण गरेको छ।
इलामको ३१ हजार ३ सय ९६ हेक्टरमा खेती गरेर वार्षिक ९१ हजार ४८ मेट्रिक टन उत्पादन हुन्छ। मकै बालीमा सुरु भएको प्रकोपले जिल्लामा खाद्यान्न र पशुपालनमा प्रभाव पर्ने भन्दै राष्ट्रिय कृषक समूह महासंघ इलामले १० वटै स्थानीय तहलाई चनाखो भएर रोकथाममा लाग्न आग्रह गरेको छ।
इलामको छिमेकी जिल्ला पाँचथरको हिलिहाङ, याङवरक, कुम्वायक, तुम्वेवा गाउँपालिका र फिदिम नगरपालिकामा फौजी किराको प्रकोप देखिएको कृषि ज्ञान केन्द्र पाँचथरका प्रमुख सागर विष्टले जानकारी दिए। १८ हजार ५६३ हेक्टरमा लगाएको मकैबारी मध्ये ७ सय हेक्टरमा फौजी किराको प्रकोप छ।
Copyright © 2019 / 2026 - Junkirikhabar.com All rights reserved
