काठमाडौं । वर्षायामसँगै बाढी–पहिरोको त्रास सुरु हुन्छ । असारदेखि भदौसम्म बाढी पहिरोको जोखिम रहन्छ । वर्षायाममा २ सय भन्दा बढी क्षेत्र जोखिममा रहने सरकारी तथ्यांक छ । बाढी–पहिरोबाट वर्षेनी ठूलो संख्यामा जन–धनको क्षति हुने गरेको विभिन्न तथ्यांकहरुले देखाएका छन् ।
विपद् व्यवस्थापनका लागि पर्याप्त तयारी नभएको जानकारहरु बताउँछन् । यसवर्ष भने स्थानीय तहलाई नै परिचालन गर्ने सरकारको तयारी रहेको छ । बाढी–पहिरो, आगलागी, हावाहुरी, हिमपात, सुख्खा खडेरी, भूकम्प विपत्तको कारण हो । अकस्मात हुने यस्ता घटनाका लागि पूर्वतयारी आवश्यक पर्छ ।
सरकारले पनि यसका लागि विशेष तयारी गरेको बताउँदै आएको छ । तर, पूर्व–तयारीकै अभावमा जन–धनको क्षति बढ्ने गरेको विगतका तथ्यांकहरुले देखाएका छन् । यस वर्ष स्थानीय तहलाई नै प्राथमिकतामा राखेर सरकारले विपद् व्यवस्थापनको तयारी गरेको छ ।
तर, त्यसका लागि पर्याप्त बजेट नरहेको स्थानीय तहबाटै गुनासो आउने गरेको छ । केन्द्रीय विपद व्यवस्थापन केन्द्रको कोषमा एक अर्ब ५० करोड रुपैयाँ समेत रहेको छ । मुलुकभर मौसममा बदली भइ वर्षा सुरु भएको छ । बाढी–पहिरो, कटानको जोखिम बढ्ने जानकारहरुले बताएका छन् ।
सरकारले तयार पारेको तथ्याङ्क अनुसार २ सय ४४ स्थानलाई बर्षायामका लागि जोखिम क्षेत्र घोषित गरिएको छ । विपद् आएका बेला मात्र सक्रियता देखाउने र अरुबेला पूर्व तयारीमा वेवास्ता गर्ने गरेको आरोप पनि लाग्दै आएको छ ।
सामान्य खालका विपद्को तयारी रहे पनि ठूला विपद्मा भने तयारी हुन नसकेको सरकारी अधिकारीहरु नै बताउँछन् । योजना बनाउन नसक्नु सरकारकै कमजोरी देख्नेहरु पनि छन् । जानकारहरुले विपद् व्यवस्थापनका लागि विशेष योजना बनाउन सरकारलाई सुझाएका छन् ।
Copyright © 2019 / 2026 - Junkirikhabar.com All rights reserved
