सुनसरीमा शुक्रवार थप १० जना नयाँ कोरोना सङ्क्रमित थपिएका छन् ।
यो सँगै सुनसरीमा कोरोना सङ्क्रमितको सङ्ख्या ५६ पुगेको छ । थपिएका सङ्क्रमितहरू सबै क्वारेनटाइनमै बसेकाहरू रहेको बताइएको छ । भोक्राहा क्वारेनटाइनमा बस्ने ६ जना, देवानगन्ज क्वारेनटाइनमा बस्ने २ जना र हरी नगर क्वारेनटाइनमा बस्ने २ जना गरी १ महिला र ९ जना पुरुष गरी जम्मा १० जना नयाँ कोरोना सङ्क्रमित थपिएका हुन् । उनीहरू देश बाहिरबाट आएर क्वारेनटाइनमा बसेकाहरू रहेको बताइएको छ ।
प्रतिष्ठानबाट ८ जना डिस्चार्ज
बीपी कोइराला स्वास्थ्य विज्ञान प्रतिष्ठान धरानबाट शुक्रवार थप ८ जना कोरोना सङ्क्रमित बिरामी निको भएर डिस्चार्ज भएका छन् ।
शुक्रवार डिस्चार्ज हुनेहरूमा झापा जिल्लाका १ जना पुरुष, ताप्लेजुङका ३ जना पुरुष, पाँचथरका १ जना पुरुष, सुनसरी भोक्राहाका ३ जना पुरुष गरी जम्मा ८ जनाको पछिल्लो पिसिआर रिपोर्ट नेगेटिभ आएकोले उनीहरूलाई अस्पतालबाट घर पठाइएको बीपी कोइराला स्वास्थ्य विज्ञान प्रतिष्ठान धरानका प्रवक्ता डा. निदेश सापकोटाले जानकारी दिएका छन् ।
प्रतिष्ठानबाट यो सँगै कोरोनाबाट निको भएर घर फर्किएकाहरूको सङ्ख्या १ सय पुगेको छ भने प्रतिष्ठानमा उपचाररत अझै २४ जना रहेको प्रतिष्ठानले जनाएको छ ।
Copyright © 2019 / 2026 - Junkirikhabar.com All rights reserved
