प्रदेश १ मा कोरोना संक्रमति थपिएसँगै उपचारपछि सन्चो (निको) हुने दर पनि बढेको छ । प्रदेशका १४ मध्ये १२ जिल्लामा कोरोनाका संक्रमित फेला परेका छन् ।
प्रदेश सामाजिक विकास मन्त्रालयका अनुसार कोरोना निको हुने दर ४५ प्रतिशतभन्दा बढी छ । कोरोनाबाट संक्रमित हुनेको संख्या ४०२ पुगेको छ । सामाजिक विकासमन्त्री जीवन घिमिरेले उपचार गरेर सन्चो हुने क्रम पनि बढ्दो क्रममा रहेको बताउँदै भने, “संक्रमित हुने मात्र होइन उपचारपछि ठीक हुने दर पनि बढ्दो क्रममा छ ।”
अस्पतालमा भर्ना भई ठीक भएर घर फर्कनेको संख्या मंगलबारसम्म १८१ जना छ । यो कुल संक्रमित संख्याको ४५ दशमलव ०२ प्रतिशत हो । मंगलबार मात्र बीपी कोइराला स्वास्थ्य विज्ञान प्रतिष्ठान धरानबाट सातजना उपचारपछि निको भएर घर फर्किएका छन् । संक्रमण हुने दर पनि बढ्दो छ ।
गत वैशाख ५ गते पहिलोपटक उदयपुरमा एकैपटक १२ जनामा कोरोना संक्रमण देखिएसँगै यो प्रदेशमा कोरोनाका संक्रमित बढ्न थालेका हुन् । अहिले भारतबाट आउनेमा अधिक संक्रमण देखिन थालेको छ । जिल्लागत रूपमा अहिलेसम्म झापामा १७८, मोरङमा ९३, सुनसरीमा ६२, धनकुटामा ८, भोजपुरमा ६, खोटाङमा ४, उदयपुरमा ४३, सोलुखुम्बुमा १, संखुवासभामा २, तेह्रथुममा २, इलाममा २ र पाँचथरमा एक संक्रमित फेला परेका छन् ।
Copyright © 2019 / 2026 - Junkirikhabar.com All rights reserved
