भारतको पश्चिम बंगाल सरकारले अवरोध गर्दा नेपालबाट भारत निर्यात गर्न लागिएका नेपाली उत्पादन बोकेका ट्रक चार दिनदेखि मेची पुलमै अलपत्र छन् ।
भारतले मुलुकका अन्य भन्सार नाकाबाट नेपाली उत्पादन निकासीमा अवरोध गर्दै आए पनि जोगवनी नाकामा त्यसको प्रभाव परेको छैन । यो नाकाबाट अहिले विशेषगरी जुटका सामग्री, रिफाइन गरिएको सूर्यमुखी तेल, तेजपत्ता, अर्थोडक्स चियालगायत नेपाली कृषिजन्य वस्तुको निकासी निर्बाध रूपमा भइरहेको विराटनगर भन्सारले जनाएको छ ।
नेपाली उत्पादन निकासीमा आइतबारसम्म भारतीय पक्षबाट अवरोध भएको छैन । ‘सामान्य अवस्थामा जुनजुन नेपाली उत्पादन निकासी हुँदै आएको थियो । अहिले पनि ती उत्पादन सहज रूपमा निकासी भइरहेको छ,’ भन्सार अधिकृत गोपी उप्रेतीले भने । उनका अनुसार पाम आयल निकासी प्रतिबन्ध भने कायमै छ ।
लकडाउनयता शनिबारसम्म जोगबनी नाकाबाट ४ अर्ब ३५ करोड ५६ लाख मूल्यबराबरका नेपाली उत्पादन निकासी भएको अधिकृत उप्रेतीले जानकारी दिए । ५१ करोड मूल्यबराबरका जुटबाट तयार गरिएका सामग्री, रिफाइन सोयाबिन तेल ७ हजार ५ सय ६८ मेट्रिक टन, रिफाइन पाम आयल ४ हजार ५ सय ६ मेट्रिक टन, चाउचाउ र नुडल्स १ हजार ३ सय ६५ मेट्रिक टन, चिराइतो र तेजपात २५ मेट्रिक टन, अम्रिसो ९ सय ९५ मेट्रिक टन र ३३ करोड ६८ लाख मूल्य बराबरको ९ सय ९ मेट्रिक टन अर्थोडक्स चिया निकासी भएको उनले बताए ।
Copyright © 2019 / 2026 - Junkirikhabar.com All rights reserved
