भारतको बिहारबाट छिटफुट रूपमा नेपालको बारा, पर्सा, रौतहट, सर्लाहीलगायतका जिल्लाहरूमा सलह किरा देखा परेपछि मध्यतराईका किसानहरू चिन्तित भएका छन् ।
फट्यांग्राकै एक प्रजतिका रूपमा रहेको सहलले बालीनालीमा एकसाथ ठूलो संख्यामा बसेर नष्ट गर्ने गर्दछ । बाराको निजगढ नगरपालिका–१३ मा छिटफुट रूपमा सलह किरा भेटिएपछि क्षेत्रीय अनुसन्धान केन्द्र परवानीपुरबाट कृषि वैज्ञानिकहरूको टोली आइपुगेको निजगढ नगरपालिका–१३ का वडाअध्यक्ष सूर्य घलानले जानकारी दिए ।
त्यसैगरी बाराको निजगढ र सिमरा, डुमरवाना, पर्साको पर्सागढी नगरपालिका क्षेत्रमा आज बिहान सलह किरा भेटिएको स्थानीय कृषकहरूले बताएका छन् । कृषि ज्ञान केन्द्र बाराका प्रमुख जितेन्द्र यादवले भारतको बिहार हुँदै नेपालको सीमावर्ती जिल्लाहरूमा आज बिहानबाट सलह किरा भेटिएको बताए ।
प्रभावित क्षेत्रमा टोली परिचालन गरी निरीक्षण गर्दा किराहरूको सानो सानो झुण्ड बनाएर रुखमा बसेको आफूहरूले भेटेको बताउँदै उनले किराहरूले विशेषतः धान र तरकारी खान थालेको जानकारी दिए ।
सलह भारतबाट नेपाल भित्रिएको पुष्टि भएसँगै सबैभन्दा बढी प्रभावित क्षेत्रको पहिचान गरी प्राविधिकसहितको टोली निजगढलगायतका क्षेत्रमा पठाइएको यादवले बताए ।
यता रौतहट जिल्लाको चन्द्रपुर नगरपालिकाको उत्तरी सीमा मकवानपुरको बकैया—१ महादेव डाँडा हुँदै चन्द्रपुर—३ अन्र्तगत भोलुम्टार, इपिल, अरुणबन्ति लमाह गुजरा नगरपालिकाको कटानीलगायतका क्षेत्रमा झुण्ड झुण्डमा सलह देखा परेको किसानहरूले बताएका छन् ।
Copyright © 2019 / 2026 - Junkirikhabar.com All rights reserved
