प्रदेश १ मा सत्तारूढ दल नेकपाकै प्रदेशसभा सदस्यहरू सरकारको विरोधमा उत्रिएका छन् । प्रदेश सरकार एकलौटी ढंगले अघि बढेको उनीहरूको आरोप छ ।
प्रदेशसभा बैठकमा नेकपा संसाद राजन राईले भ्रष्टाचार बढ्दै गए पनि प्रदेश सरकार उदासीन रहेको बताए । ‘प्रदेश सरकारका विकास निर्माणलगायत योजना तथा आयोजनामा व्यापक भ्रष्टाचार भइरहेको छ,’ उनले भने, ‘खानेपानी, ढललगायत विकास निर्माण योजनामा सरकारले भ्रष्टाचार नदेखे प्रदेशसभा सदस्यहरू प्रमाण उपलब्ध गराउन तयार छन् ।’
यसअघि नेकपाकै प्रदेशसभा सदस्य कला घलेले सरकारले जनताको गुनासो नसुनेको संकेतस्वरूप बैठकमा दुवै कान थुनेर बोल्दै विरोध जनाइन् । प्रदेशसभा सदस्यहरूले सरकारले आफूहरूलाई वास्तै नगरेको, जनताका गुनासा सुनुवाइ नगरेको, अगामी वर्षको बजेट सरकारका मन्त्रीहरूले आ–आफ्ना निर्वाचन क्षेत्रमा खन्याएको, एकलौटी ढंगले अघि बढेको र आर्थिक अनियमिततामा डुबेको आरोप लगाउँदै आएका छन् ।
प्रदेशसभाको चालू बजेट अधिवेशनका २६ वटा बैठकमा ९१ जना प्रदेशसभा सदस्यले २ सय ८८ पटक बोलेका छन् । जसमा सत्तारूढ दलका ६३ जनाले १ सय ८२ पटक बोल्दा उनीहरूको प्रस्तुति प्रायः प्रदेश सरकारको विरोधमै देखिन्छ । यसले मुख्यमन्त्री शेरधन राई नेतृत्वको सरकारको औचित्यमाथि नै प्रश्न उठ्न थालेको छ ।
Copyright © 2019 / 2026 - Junkirikhabar.com All rights reserved
