केराबारी गाउँपालिकाका अध्यक्ष रोहित कार्कीमाथि कार्यलयमै आक्रमण भएको छ । शुक्रबार उपाध्यक्ष शान्तिकुमारी लिम्बू भुजेलको कार्यकक्षमा छलफल गरिरहेको अवस्थामा आक्रमण भएको हो ।
शुक्रबार बिहान ११ बजेतिर केराबारी–१० मा रहेको गाउँपालिका कार्यालयमा पुगेका कार्की उपाध्यक्ष भुजेलको भूइँ तलामा रहेको कार्यकक्षमा रहेको अवस्थामा केराबारी–१० का ३४ वर्षीय भाले भनिने भवन ठकुरीले आक्रमण गरेका थिए ।
घटनाको प्रत्यक्षदर्शी समेत रहेकी उपाध्यक्ष भुजेलका अनुसार कार्यकक्षमा प्रवेश गरेको करिब पाँच मिनेट पछाडी एक्कासी अध्यक्ष माथि चक्कु प्रहार भएको थियो ।
घटनामा प्रयोग गरिएको खुकुरी र भाँचिएको चक्कुुसहित नियन्त्रणमा लिएर प्रहरीले ठकुरीलाई इलाका प्रहरी कार्यालय बेलबारीमा राखिएकाे छ ।
पटके कर संकलनका लागि ठकुरीले २०७६–०७७ को असार मसान्तसम्म गाउँपालिकाको ठेक्का लिएका थिए । ठेक्का सम्झौता सकिएसँगै साउन १ देखि गाउँपालिका आफैले कर्मचारी खटाएर कर उठाउन थालेपछि सुरु भएको विवादका विषयलाई लिएर कार्कीमाथि आक्रमण भएको पाइएको प्रहरीको भनाइ छ ।
Copyright © 2019 / 2026 - Junkirikhabar.com All rights reserved
