प्रदेश १ स्थित सरकारी कार्यालयका कर्मचारीले विकास निर्माणलगायत योजनामा १५ प्रतिशतसम्म कमिसन माग्ने गरेको सत्तारूढ नेकपाका प्रदेशसभा सदस्यले आरोप लगाएका छन् ।
प्रदेशसभा बैठकमा आइतबार शून्य समयमा बोल्दै नेकपाका प्रदेशसभा सदस्य रामकुमार राईले जिल्लाहरूमा कर्मचारीहरूले मुख्यमन्त्री, मन्त्री, प्रमुख सचिव, सचिवका नाममा माथि बुझाउनुपर्छ भन्दै ५ देखि १५ प्रतिशतसम्म घूस रकम माग्ने गरेको बताए । अख्तियार दुरुपयोग अनुसन्धान आयोगले मुख्यमन्त्री शेरधन राईले नै नेतृत्व गरेको भौतिक पूर्वाधार विकास मन्त्रालय मातहतका सिँचाइ डिभिजन कार्यालय खोटाङका प्रमुख ९ लाख ३४ हजार घूस रकमसहित पक्राउ परेको प्रसंग पनि सुनाए ।
‘हाम्रा मुख्यमन्त्री, मन्त्री, प्रमुख सचिव, सचिवहरूले कर्मचारीहरूसँग घूस माग्छन् जस्तो लाग्दैन,’ उनले भने, ‘प्रदेश सरकारलाई बदनाम गराउने भ्रष्ट कर्मचारीलाई मानहानीको मुद्दा हालेर थप कारबाही गर्नुपर्छ । होइन भने माथिबाटै घूस मागेको पुष्टि हुन्छ ।’
Copyright © 2019 / 2026 - Junkirikhabar.com All rights reserved
