साउनको सोमबार पिण्डेश्वरमा बोलबम मेला लाग्ने गर्छ । तर, यो बर्ष भने परिस्थिति सहज छैन । विश्वभर कोभिड १९ को महामारी छ, र नेपालमा पनि सरकारले यसको संक्रमणबाट जोगिन लकडाउनलाई जारी राखेको छ । लकडाउन चैत ११ गतेबाट भएदेखि नै मठमन्दिरहरु बन्द छन् ।
त्यसैले यसबर्ष साउन महिनामा पनि पिण्डेश्वर मन्दिर बन्द नै हुनेछन् । साउन ९ गतेसम्म त सरकारले लकडाउन नै घोषणा गरेको छ । त्यसअघि मन्दिर सर्वसाधारण, तीर्थालुहरुको लागि खुला हुने सम्भावना छैन । तसर्थ, स्थानीय सरकार, पिण्डेश्वर बाबाधाम समिति र प्रशासनले पनि यो बर्ष साउनको सोमबार जल चढाउन पिण्डेश्वर बाबाधाममा नआउन आग्रह गरेका छन् । यो बिषयमा २ दिनअघि उपमहागनरपालिका, मन्दिर व्यवस्थापन र प्रशासनसँग छलफल भएको थियो ।
इलाका प्रशासन कार्यालय धरानका प्रमुख चन्द्रबहादुर कार्कीले सरकारले नै मठमन्दिरमा नित्य पुजाबाहेक अरु पुजाआजाको कार्य रोक्ने निर्देशन भएकोले सबै भक्तजनहरुसम्म यो खबर पुर्याउनुपर्ने बताए । ‘मन्दिर नखोल्ने निर्णय छ, त्यसैले यो सुचना श्रद्धाजुल भक्तजनहरुसम्म पुर्याउनुपर्छ । उहाँहरुले दुःख पाउनुहुन्न, र भिडभाडबाट हुने संक्रमणबाट पनि जोगिनुहुन्छ,’कार्कीले भने,‘यहाँसम्म आउनै नदिने व्यवस्था मिलाउनुपर्छ, आइहाल्नु भयो भने सम्झाउने फर्काउने गर्नुपर्छ । नाकाबाटै सम्झाई, बुझाई गरेर फर्काउने गर्नुपर्छ ।’
Copyright © 2019 / 2026 - Junkirikhabar.com All rights reserved
