प्रदेश १ मा हालसम्म कोरोना भाइरसबाट संक्रमित हुनेको संख्या आठ सय ४८ पुगेको छ। चार प्रहरीसहित १३ जना नयाँ संक्रमित बिहीबारमात्रै थपिएका छन्।
मोरङमा आठ, सुनसरी र धनकुटामा दुई–दुई र झापामा एक जनामा संक्रमण देखिएको सामाजिक विकास मन्त्रालयले जनाएको छ। मोरङको विराटनगरमा चार पुरुष, बूढीगंगामा तीन पुरुष र एक महिला, सुनसरीको कोशी गाउँपालिकामा दुई पुरुष, धनकुटाको छथर जोरपाटीमा दुई पुरुष र झापाको अर्जुनधारामा एक पुरुषको रिपोर्ट पोजिटिभ आएको मन्त्रालयले जनाएको छ। विराटनगरका संक्रमित भनिएका चार जना पुरुष प्रहरी हुन्।
प्रदेश १ बाट उपचारपछि निको भएर बिहीबार १० जना डिस्चार्ज भएका छन्। मोरङको सुन्दरहरैंचा नगरपालिकाको गोठगाउँमा रहेको पूर्वाञ्चल विश्वविद्यालय कोभिड–१९ आइसोलेसन अस्पतालबाट १० जना पुरुष डिस्चार्ज भएको मन्त्रालयले जनाएको छ। प्रदेश १ मा डिस्चार्ज हुनेको संख्या हालसम्म सात सय २३ पुगेको छ।
प्रदेश १ मा पछिल्लो पाँच सय ३४ जनाको कोरोना परीक्षण गरिएको छ। परीक्षण गरिएका मध्ये १३ जनाको रिपोर्ट पोजिटिभ आएको मन्त्रालयका प्रवक्ता डा.सुरेश मेहताले बताए। बिहीबारसम्ममा ३८ हजार एक सय ३५ जनाको कोरोना परीक्षण गरिसकिएको डा.मेहताको भनाइ छ।
Copyright © 2019 / 2026 - Junkirikhabar.com All rights reserved
