इटहरीमा बिहानैदेखि लकडाउनलाई कडा बनाइएको छ । इटहरीमा सवारी साधनहरूलाई पूर्ण रूपमा रोक लगाइएको छ भने पसलहरू बन्द छन् । मङ्गलवार प्रमुख जिल्ला अधिकारी फडिन्द्रमणि पोखरेल र इटहरी उपमहानगरपालिकाका मेयरको अध्यक्षतामा बसेको बैठकले ५ दिनका लागि लकडाउन गर्ने निर्णय गरेको थियो ।
केही दिनयता इटहरी उपमहानगरपालिकाका तीन जना कर्मचारी सहित २३ जनामा कोरोना पुष्टि भएपछि लकडाउन गर्न प्रशासन र स्थानीय निकायलाई दबाब परेको थियो ।
१५ गते यता मात्रै १३ सय ३४ जनाको स्वाब सङ्कलन गरिएको र तीमध्ये मङ्गलवार मात्रै ४ जनामा कोरोना भाइरसको सङ्क्रमण देखिएपछि लकडाउन गर्ने निर्णय गरिएको इटहरी उपमहानगरपालिकाकाले जनाएको छ । आजबाट दूध र औषधीका पसलहरू बाहेक सम्पूर्ण पसल व्यवसाय, तथा कार्यालयहरू समेत बन्द हुने गरी लकडाउन गर्ने निर्णय गरिएको छ । उद्योग कलकारखाना बाहेक सबै क्षेत्र बन्द हुने बताइएको छ ।
पसल खोले ५ हजार रुपैयाँ जरिवाना गर्ने नगरपालिकाले चेतावनी दिएको छ।
यस्तै इटहरीस्थित यातायात कार्यालय २३ गतेसम्मका लागि बन्द गरिएको छ। कार्यालयले सूचना जारी गर्दै २१ गतेदेखि २३ गतेसम्म कार्यालय बन्द हुने जनाएको छ।
यता सुनसरीको रामधुनी नगरपालिका, भोक्राहा नर्सिङ गाउँपालिका, कोशी गाउँपालिका, हरिनगर गाउँपालिका लगायतले समेत लकडाउन गरेका छन्। बराह नगरपालिका र धरान उपमहानगरपालिकाले बिहीबार देखी लकडाउन घोषणा गरेका छन् ।।
Copyright © 2019 / 2026 - Junkirikhabar.com All rights reserved
