विराटनगरस्थित न्यूरो कार्डियो एण्ड मल्टिस्पेसियालिटी हस्पिटलले भेन्टिलेटरसहितको ५० शैय्याको कोभिड अस्पताल सञ्चालनमा ल्याएको छ। विराटनगर–९ महेन्द्र चौकमा रहेको न्यूरोको शाखा मदर एण्ड चाइल्ड अस्पताललाई कोभिड अस्पतालमा रुपान्तरण गरी शुक्रबारदेखि सञ्चालनमा ल्याएको हो।
सुविधासम्पन्न न्यूरोको कोभिड अस्पतालको सामाजिक विकासमन्त्री जीवन घिमिरेले निरीक्षण तथा उद्घाटन गरे। समुदायस्तरमा कोरोना संक्रमण फैलिएपछि संक्रमित राखेर उपचार गर्ने उदेश्यले पहिलो पटक विराटनगरमा संचालित निजीस्तरको अस्पतालले कोभिड अस्पताल सञ्चालनमा ल्याएका हो। न्यूरोको कोभिड अस्पतालमा जनरल ४२, आइसियु ७ र भेन्टिलेटर २ शैय्या रहेको न्यूरो कार्डियो एण्ड मल्टिस्पेसियालिटी हस्पिटलका अपरेशन डाइरेक्टर राजेश भट्टराईले जानकारी दिए।
न्यूरोको कोभिड अस्पतालमा लक्षणसहितका संक्रमितहरूले उपचार गरिने भट्टराईको भनाइ छ। प्रदेश एकमा पछिल्ला दिनमा कोरोना संक्रमितहरुको संख्या बढेसँगै कोभिड अस्पतालमा शैय्या अभावका कारण संक्रमितहरूको उपचारमा समस्या हुँदै आएको थियो। न्यूरो अस्पतालले कोभिड क्राईसिस मेनेजमेन्ट समिति अस्पतालस्तरमै गठन गरेर विराटनगरमा सबैभन्दा पहिले कोरोना संक्रमितको उपचार गरेको थियो।
विराटनगरमा यसअघि विराट मेडिकल कलेज एण्ड टिचिङ हस्पिटलले ६० शैय्याको आईसोलेशन सञ्चालन गरिसकेको छ। कोरोना संक्रमण भएको अवस्थामा रकम बुझाएर सुविधा सम्पन्न होटल यासटिकमा पनि ६० शैय्याको आइसोलेशन तयार पारिएको थियो।
Copyright © 2019 / 2026 - Junkirikhabar.com All rights reserved
