जिल्ला प्रशासन कार्यालय सुनसरीले अत्यावश्यक सेवाका रुपमा रहेका स्वास्थ्य संस्थाहरु कुनैपनि बहानामा बन्द नगर्न र बन्द गरे कानुनी कारवाही गर्ने चेतावनी दिएको छ ।
बुधवार प्रमुख जिल्ला अधिकारी फणिन्द्रमणी पोखरेलले सूचना जारी गर्दै स्वास्थ्य प्रतिष्ठान, अस्पताल, नर्सिङ होम बन्द गरेको गुनासो आएको उल्लेख गर्दै हालको विषम परिस्थितिमा प्रभावकारी सेवा दिने स्वास्थ्य संस्थाहरु बन्द नगर्न सचेत गराएका हुन ।
प्रजिअ पोखरेलले कुनैपनि बाहानामा स्वास्थ्य संस्था बन्द गरी सर्वसाधरणको स्वास्थ्यमा खेलवाड गरेको पाईएमा कानून बमोजिम कारवाही हुने सूचना उल्लेख गर्दै स्वास्थ्य संस्थाहरुले अस्पताल सञ्चालनको व्यवश्था मिलाउन निर्देशन गरिएको छ ।
इनरुवा अस्पताल पनि केही दिनअघि प्रसुति जाँचबाहेक सेवा बन्द गरिएको, बीपी कोइराला स्वास्थ्य बिज्ञान प्रतिष्ठानमा विभिन्न बहानामा अस्पतालको सेवा प्रभावित पार्ने प्रयास गरिएको, इटहरी, धरान र दुहवीमा रहेका उपचार केन्द्रहरु पनि विभिन्न बहानामा सेवा नदिने अवस्थामा रहेको जस्ता विषयहरु एकपछि अर्को घटनाहरु बाहिर आउन थालेपछि उपचार पाउनबाट सर्वसाधारणहरु बञ्चित हुने अवस्था उत्पन्न भएपछि प्रशासनले त्यस्तो चेतावनी दिएको हो ।
केही समयदेखि निजी स्वास्थ्य संस्थाहरुले कोरोनाका कारण देखाउँदै अन्य विरामीहरुको उपचार गर्न नमान्दा अनाहकमा ज्यान गुमाउने स्थिति उत्पन्न भएको छ । हालसालै मधुवनका एक बीस सेवन गरेका विरामीलाई अस्पतालहरुले उपचार गर्न नपाएपछि अस्पताल खोज्दा खोज्दै उनको ज्यान गएको थियो ।
Copyright © 2019 / 2026 - Junkirikhabar.com All rights reserved
