सुनसरीमा शुक्रवार १८ जना सुरक्षाकर्मीसहित ४१ जना नयाँ कोरोना संक्रमित थपिएका छन । जसमध्ये सबैभन्दा बढी सदरमुकाम इनरुवाका रहेका छन । इनरुवामा मात्रै २० जना नयाँ संक्रमित फेला परेका छन ।
सुनसरीको धरानमा २ जना नेपाली सेना संक्रमित भएका छन् । त्यसैगरी सरुवा भई सुनसरी आएर स्वाब संकलन पश्चात इनरुवा बसपार्कमा क्वारेन्टिनमा बसेका मध्ये १३ जना प्रहरीको कोरोना परीक्षण रिपोर्ट पोजेटिभ आएको हो ।
कोशी गाउँपालिकामा कार्यरत २ जना प्रहरी समेत संक्रमित पाइएका छन् । कोशीका थप एक संक्रमित भने सशस्त्र प्रहरी रहेको बताइएको छ ।
जिल्ला प्रहरी कार्यालय सुनसरी सरुवा भएर आएका ४४ जनाको इनरुवा अस्पतालमा स्वाव संकलन गरिएको मध्येबाट थपिएका १३ जना र इनरुवामा थप सात जनामा संक्रमण देखिएको छ । जसमा एकजना ७४ वर्षिय वृद्धसमेत छन् । उनी इनरुवा ५ बलाहा घर भएका व्यक्ति हुन् । वृद्धसहित इनरुवाका ७ जना सर्वसाधारणमा कोरोना पुष्टि भएको छ ।
जसमध्ये इनरुवा वडा नम्बर १ घर भएका दुई जना रहेका छन् । जसमध्ये एकजना टिकट बुकिङको काम गर्ने पुरुष हुन् । अर्का भने बैंकमा काम गर्ने सुरक्षा गार्ड रहेको इनरुवा नगरपालिकाले जनाएको छ । त्यसैगरी इनरुवा ५ घर भएकी महिलासमेत संक्रमित पाइएकी छिन् । उनी स्थानीय सहकारीमा कार्यरत रही घरदैलोमा रकम संकलन गर्ने महिला भएको बताइएको छ ।
त्यसैगरी प्राप्त पछिल्लो विवरण अनुसार इनरुवा ४ का तीनजना समेत संक्रमित थपिएका छन् । तीनै जना पुरुष भएको वडाध्यक्ष श्यामदेव मेहताले जानकारी दिए ।
शुक्रबार थपिएका संक्रमितहरुमा धरानका ९, देवानगञ्जका ४, इटहरीका ५, कोशीमा ३ र इनरुवामा १३ प्रहरी सहित २० जना रहेका छन् । शुक्रबार संक्रमित हुनेमा वीपी प्रतिष्ठान धरानकी नर्स समेत रहेकी छिन् ।
पछिल्लो थपिएको संंख्या सहित सुनसरीमा कोरोना संक्रमितको संख्या ५ सय ७७ पुगेको छ । जसमध्ये २ सय ३५ जना निको भएको स्वास्थ्य कार्यालय सुनसरीले जनाएको छ ।
Copyright © 2019 / 2026 - Junkirikhabar.com All rights reserved
