पछिल्लो समय तीव्र रुपमा संक्रमण फैलिएको प्रदेश १ मा कोरोना भाइरस संक्रमितको संख्या नौ हजार नाघेको छ। एकै दिन शुक्रबार चार सय ८५ जना नयाँ बिरामी थपिएपछि संक्रमित संख्या नौ हजारबाट उकालो लागेको हो।
हालसम्म एक लाख ३४ हजार सात सय ७३ जनाको पीसीआर परीक्षण हुँदा संक्रमित संख्या नौ हजार तीन सय ४१ पुगेको जानकारी सामाजिक विकास मन्त्रालयले दिएको छ। स्वाबको परीक्षण गरिएका मध्ये एक लाख २५ हजार चार सय ३२ जनाको रिपोर्ट नेगेटिभ आएको छ।
२४ घण्टामा संक्रमण पुष्टि भएका नयाँ चार सय ८५ संक्रमितको संख्या यसअघि दैनिक थपिएको भन्दा उच्च हो। दुई हजार चार सय ४३ जनाको पीसीआर परीक्षण हुँदा शुक्रबार एक सय ४९ महिला तीन सय ३६ पुरुषको रिपोर्ट पोजिटिभ आएको मन्त्रालयले जनाएको छ।
नयाँ थपिएका संक्रमितमा मोरङका दुई सय ३०, सुनसरीका एक सय ४३, झापाका ३३, इलामका १०, धनकुटाका सात, संखुवासभाका छ, उदयपुरका पाँच, भोजपुर र ताप्लेजुङमा चार–चार, खोटाङका दुई, तेह्रथुम र ओखलढुंगाका एक–एक र प्रदेश १ बाहिरका ३९ जना रहेका छन्। प्रदेश राजधानी विराटनगरमा ५१ महिला र एक सय एक पुरुष गरेर एक सय ५२ जना नयाँ संक्रमित थपिएका छन्।
संक्रमण पुष्टि भएर विभिन्न कोभिड अस्पताल, होम आइसोलेसन र संस्थागत आइसोलेसनमा उपचाररतमध्ये चार हजार सात सय ७४ जना सफल उपचारपछि डिस्चार्ज भएका छन्। शुक्रबार एक सय १३ जना कोरोनामुक्त हुँदै डिस्चार्ज भए। कोरोना जित्दै शुक्रबार डिस्चार्ज भएका सबै होम आइसोलेसनका हुन्।
Copyright © 2019 / 2026 - Junkirikhabar.com All rights reserved
