सुनसरीमा सोमबार चारजना कोरोना संक्रमितको मृत्यु भएको छ । कोरोना भाइरस संक्रमणका कारण होम आइसोलेसनमा बसेका तीन र एकजनाको बीपी कोइराला स्वास्थ्य विज्ञान प्रतिष्ठान धरानमा उपचारका क्रममा निधन भएको हो ।
होम आइसोलेसनमा मृत्यु हुनेमा धरान ८ का ७० वर्षीय र धरान १५ का ७४वर्षीय पुरुषको मृत्यु भएको धरान उपमहानगरपालिका स्वास्थ्य शाखा प्रमुख उमेश मेहताले जानकारी दिए । त्यस्तै बराहक्षेत्र नगरपालिका ११ की उमेर नखुलेकी एक महिलाको पनि होम आइसोलेसनमै मृत्यु भएको सुनसरीका प्रमुख जिल्ला अधिकारी फडिन्द्र मणि पोखरेलले बताए ।
होम आइसोलेसनमा मृत्यु भएकाहरुको शव व्यवस्थापनका लागि नेपाली सेनालाई खबर गरिसकिएको पनि उनले जानकारी दिए। त्यस्तै वीपी प्रतिष्ठानमा इटहरी उपमहानगरपालिका–२० का ७८ वर्षीय पुरुषको उपचारका क्रममा मृत्यु भएको प्रतिष्ठानका सहायक प्रवक्ता डा. आशिष श्रेष्ठले जानकारी दिए ।
सुनसरीमा कोरोना भाइरसको संक्रमणका कारण मृत्यु हुनेको संख्या ५६ पुगेको छ । दैनिक मृत्युदर बढिरहँदा समेत स्थानीय सरकारले भने लकडाउन गर्नुपर्ने किरात याक्थुम चुम्लुङ धरानका सचिव जय सम्बाहाम्फेले बताए ।
सुनसरीमा दैनिक २ सय भन्दा बढी संक्रमित थपिने र दैनिक चार/पाँच जनाको मृत्यु हुन थालेकाले लकडाउनलाई कडा पार्नुपर्ने उनको माग छ । सुनसरीका प्रमुख जिल्ला अधिकारी पोखरेलले भने जिल्लामा पूर्ण लकडाउन गर्न पटक–पटक सर्वदलीय छलफल गर्दा राजनैतिक दलहरुबाटै सहमति नभएका कारण लकडाउन गर्न नसकिएको बताए।
Copyright © 2019 / 2026 - Junkirikhabar.com All rights reserved
