पछिल्लो २४ घण्टामा कोरोना भाइरसबाट थप ८ जनाको मृत्यु भएको छ । कोरोना संक्रमणबाट सुनसरीमा चार र पोखरामा चार जनाको मृत्यु भएको हो । सुनसरीमा मृत्यु हुनेमा धरान उपमहानगरपालिका र बराहक्षेत्र नगरपालिकाका संक्रमित छन् ।
बीपी कोइराला स्वास्थ्य विज्ञान प्रतिष्ठानका अनुसार असोज २० गते कोरोना पुष्टि भएकी धरान–१७ की ६२ वर्षीया महिलाको शनिबार मृत्यु भएको छ । कात्तिक ७ गते प्रतिष्ठानको कोभिड अस्पताल भर्ना गरिएकी उनलाई पहिल्यैदेखि मृगौलासम्बन्धी समस्या थियो । यसैगरी धरान–१५ बाझगराकी ५६ वर्षीया महिलाको पनि कोरोना संक्रमणबाट मृत्यु भएको छ ।
बीपी प्रतिष्ठानमा आईसीयू र भेन्टिलेटर नपाएपछि विराटनगरस्थित नोबेल अस्पतालमा उपचार गर्दागर्दै ती महिलाको मृत्यु भएको हो । यस्तै, कोरोना संक्रमणबाटै धरान–१३ का ५३ वर्षीय पुरुषको मृत्यु भएको छ भने संक्रमणबाटै बराहक्षेत्र नगरपालिका–१० का ४२ वर्षीय एक पुरुषको पनि मृत्यु भएको छ ।
यता, पोखरा स्वास्थ्य निर्देशनालयका अनुसार मृतक चारैजना पोखरा महानगरपालिकाको भएको खुल्न आएको छ । पोखरा–१ का ४२ वर्षीय कोरोना संक्रमित पुरुषको शनिबार बेलुका चरक मेमोरियल अस्पतालमा निधन भएको थियो ।
कोभिड–१९ संक्रमित उनलाई निमोनियाको समेत समस्या रहेको निर्देशनालयले जनाएको छ । यसैगरी, पोखरा महानगरपालिका–२२ का ६८ वर्षीय पुरुषको पनि शनिबार गण्डकी मेडिकल कलेज, पोखरामा उपचारका क्रममा निधन भएको छ ।
कोभिड–१९ सहित निमोनियाको समस्या रहेको उनमा कार्तिक ६ गते कोरोनाको संक्रमण पुष्टि भएको थियो । संक्रमण पुष्टि भएलगत्तै उनलाई ७ गते नै उपचारका लागि अस्पताल भर्ना गरिएको थियो । अर्का मृतक पोखरा महानगरपालिका–३१ का ५८ वर्षीय पुरुष हुन् ।
यस्तै, पोखरा महानगरपालिका–१५ का ५२ वर्षीय महिलाको शनिबार राति पोखरा स्वास्थ्य विज्ञान प्रतिष्ठान पोखराको आईसियुमा उपचारका क्रममा निधन भएको हो ।
Copyright © 2019 / 2026 - Junkirikhabar.com All rights reserved
