कोरोना सङ्क्रमितको कन्ट्रयाक ट्रेसिङ नहुँदा प्रदेश १ मा कोरोना सङ्क्रमण तीव्र गतिमा बढेको बताइएको छ ।
यस भन्दा अघि कोरोना सङ्क्रमितको कन्ट्रयाक ट्रेसिङ गरेर उ सँग सम्पर्कमा रहेकाहरूलाई कन्ट्रयाकमा राखी उसको स्वास्थ्य परीक्षण गर्ने गरिन्थ्यो ।
तर पछिल्लो समय स्थानीय सरकार पालिकाहरूले आफ्नो पालिकामा कोरोना सङ्क्रमितहरूको सङ्ख्या मात्रै गने र सङ्क्रमितको सम्पर्कमा आएकाहरूलाई नगनिँदा र कन्ट्रयाक ट्रेसिङ नगरिँदा संक्रमित बढेको प्रदेश १ सामाजिक विकास मन्त्रालयका स्वास्थ्य महाशाखा प्रमुख सागर प्रसाईँले बताए ।
उनका अनुसार प्रदेश नं। १ मा कोरोना सङ्क्रमितको सङ्ख्या २१ हजार ६ सय १५ पुगेको छ । प्रदेश १ को कुल संक्रमित मध्ये सुनसरी, मोरङ र झापामा मात्रै ८७ प्रतिशत संक्रमित रहेका छन् । यी मध्येबाट १३ हजार ५ सय ७३ जना संक्रमित निको भइसकेका छन् ।
संक्रमित र निको भएकाहरूको तथ्याङ्कलाई हेर्ने हो भने ७ हजार ८ सय ५ जना आइसोलेसनमा रहनु पर्ने हो । तर अहिले करिब २ सय जना आइसोलेसनमा बसेको रेकर्ड छ भने बाँकी १ सय ५० जना अस्पतालमा उपचाररत छन् ।
बाँकी संक्रमित काहा र कुन अवस्थामा छन् रेकर्ड नहुनु नै कोरोना सङ्क्रमणको मुख्य कारण भएको प्रमुख प्रसाईँले बताए । प्रदेश नं. १ मा ८७ बेडको आइसियु, ३० वटा भेन्टिलेटर छन् । अहिले सम्म आइसियुमा ४४ जना र १० जनाको भेन्टिलेटरमा उपचार भएको प्रदेश १ सामाजिक विकास मन्त्रालयको स्वास्थ्य महाशाखाले जनाएको छ ।
Copyright © 2019 / 2026 - Junkirikhabar.com All rights reserved
