कोरोना सङ्क्रमणको कारण रोकिएको समुदाय प्रहरी साझेदारी कार्यक्रम इटहरीमा पुर्न सुरु गरिने भएको छ ।
इलाका प्रहरी कार्यालय इटहरी र इटहरी उपमहानगरपालिकाका १६ वटा वडा संयोजकको भेलाले कार्यक्रमलाई अब निरन्तर्ता दिने निर्णय गरेको छ । वडा संयोजक भेलाले कोरोनाको सङ्क्रमणलाई ध्यानमा राख्दै वडाहरूमा टोल समिति निर्माणको कामलाई सक्ने, ब्यानर बनाउने र कार्यक्रमहरू बनाएर सचेतनामूलक कार्यक्रम गर्ने निर्णय गरेको छ।
समुदाय प्रहरी पालिका समिति इटहरीको आयोजना गरिएको कार्यक्रममा अब प्रहरी र जनप्रतिनिधिहरू एक भएर कार्यक्रमलाई प्रभावकारी रूपमा समुदाय माझ पुराउने सहमति भएको थियो । पालिका समितिका संयोजक मेयर द्वारिकालाल चौधरीको अध्यक्षतामा भएको भेलाले समाजमा बढ्दो महिला हिंसा, साइबर अपराध, ठगी जस्ता घटनाहरू न्यूनीकरण गर्न प्रहरी र जनप्रतिनिधि एक भएर लाग्नु अबको आबश्कता भएको वडाध्यक्षहरूले जोड दिएका थिए । इलाका प्रहरी कार्यालय इटहरीका डिएसपी अर्जुन केसीले पनि समुदाय सुरक्षाको लागि तल्लो तहबाट गरिने कार्यक्रमले प्रभावकारिता राम्रो देखाउने बताउनुभयो ।
कार्यक्रममा कोरोना सङ्क्रमणको बिचमा पनि समुदायसँग जोडिएर इटहरी प्रहरी विभिन्न कार्यक्रम गरेको समेत केसीले वडा संयोजकको भेलामा जानकारी गराउनुभएको थियो ।
