सुनसरीका चारसहित देशभर एक सय २० केन्द्रबाट खोप अभियान सुरु भएको छ। सरकारले प्राथामिकता निर्धारण गरेर खोप अभियान सुरु गरेको छ । पहिलो प्राथमिकतामा सरकारले स्वास्थ्यकर्मी, स्वास्थ्य संस्थामा काम गर्ने सहयोगी कर्मचारी, महिला स्वास्थ्य स्वयम्सेविका, सफाइ कर्मचारी, एम्बुलेन्स तथा शव वाहन चालक, कोभिडबाट मृत्यु भएका शव व्यवस्थापनमा खटिने व्यक्ति र त्रिभुवन अन्तराष्ट्रिय विमानस्थलमा खटिने कर्मचारीलाई राखेको छ ।
सरकारको यही प्राथामिकतालाई ध्यानमा राखेर सुनसरीको इटहरीमा पनि आजै खोप अभियान प्रारम्भ भएको छ ।
इटहरी अस्पतालका इमर्जेन्सी शाखा प्रमुख रामकुमार धमलाले सुनसरीमा पाँच हजारभन्दा बढीलाई कोरोना विरुद्धको खोप लगाइने जानकारी दिए । विशेषगरी सुनसरीमा अग्रपंक्तिमा खटिने स्वास्थ्यकर्मी र सुरक्षाकर्मीलाई इटहरी अस्पताल, इनरुवा अस्पताल, बीपी कोइराला स्वास्थ्य विज्ञान प्रतिष्ठान धरान र विजयपुर अस्पताल धरानबाट खोप दिइने उनको भनाइ छ ।
‘हामीले आज एकैपटक सुनसरीको चार ठाउँबाट कोरोना भाइरस विरुद्धको खोप अभियान सुरु गरेका छौँ । नेपालमा १० लाख डोज खोप उपलब्ध भएकोमा पहिलो चरणमा पाँच लाख डोज खोप दिँदै छौँ । त्यसमध्ये सुनसरीमा मात्र पाँच हजार जनालाई कोरोना विरुद्धको खोप नेपाल सरकारको स्वास्थ्य तथा जनसंख्या मन्त्रालायले उपलब्ध गराएको छ ।
इटहरीमा हामी तीन सयभन्दा धेरैलाई नेपाल सरकारले निर्धारण गरेको प्राथमिकताको आधारमा खोप दिने छौँ’ उनले भने ।
Copyright © 2019 / 2026 - Junkirikhabar.com All rights reserved
