इटहरीमा बितेको एक महिना यता खाने तेलको बजार मूल्यमा अस्वाभाविक वृद्धि भएपछि इटहरी उपमहानगरपालिकाले सोमबार बजार अनुगमन गरेको छ । कुनै वस्तुको मूल्य एक÷दुई रुपैयाँ बढ्नु सामान्य हो तर, इटहरीमा खाने तेलको मूल्य प्रति प्याकेट आठ देखि दश रुपैयाँसम्म वृद्धि भएपछि बजारमा तेलको मूल्य कसरी बढ्यो भन्ने थाहा पाउन उपमहानगरले बजार अनुगमन गरेको हो ।
बितेको एक महिनामा राजनैतिक अस्थिरताका कारण बजारमा चलखेल भएको थाहा पाएर अनुगमनमा निस्किएको उपमहानगरकी उपप्रमुख लक्ष्मी गौतमले जानकारी दिइन् । आकस्मिक रूपमा महानगरपालिकाले गरेको बजार अनुगमनमा ट्याङ्ग्रा खोला छेउमा सञ्चालनमा रहेको आशिष् ट्रेडमार्क तेलको मूल्य १० रुपैयाँले बढेको पाइएको हो ।
उपमहानगरले सोमबार इटहरीको मुख्य चौक आसपासका होलसेल तथा डिलरहरूमा समेत अनुगमन गरेको छ । अनुगमनको क्रममा प्राय सबै पसलहरूमा मूल्य वृद्धि भएको पाइएको उपमहानगरले जानकारी दिएको छ ।
