इटहरीमा रहेका विभिन्न संघसंस्थाहरुले जनचेतनामूलक होडीङ बोर्ड राखेका छन् । मोक्ष पुर्नजिवन केन्द्र इटहरी, हेल्पीङ हेण्डस क्लब, हेल्पीङ युथ र निलगिरी गोरखा होटेल, इलाका प्रहरी कार्यालय इटहरीको संयुक्त प्रयासमा इटहरीको तरहरादेखि पुव पृतना हेड क्वाटरसम्म ६ वटा होडिङ वोर्ड राखिएको हो ।
इलाका प्रहरी कार्यालय इटहरीका प्रमुख प्रहरी नायव उपरीक्षक अर्जुन केसीले निर्माणाधीन ६ लेन सडक परियोजनाको काम र तीव्र गतिमा सवारीसाधन चलाउँदा इटहरीमा दुर्घटना बढेको जानकारी दिए । मोटरसाइकल र साना सवारीसाधन इटहरीमा बढी दुर्घटना हुने गरेको उनले जानकारी दिए ।
उनले इटहरीमा सडक फराकिलो हुँदै गर्दा दुर्घटना पनि बढ्दै गएको जानकारी दिए । इटहरीको तरहरा, पिपल चोक आसपासमा ६ लेन सडक परियोजनाको काम लगभग सकिएको छ । हलगडा चौक, पुवी पृतना हेडक्वार्टर अगाडि र विराटनगर लाइनमा ६ लेन सडक परियोजनाको काम भइरहेको छ । हेप्पीङ हेण्डस क्लब इटहरीका अध्यक्ष राजेश राईले इटहरीमा बढ्दो सवारी दुर्घटना न्यूनीकरणको लागि होडीङ बोर्ड राखिएको जानकारी दिए । यसले सवारी चालकलाई सचेत गराउने र दुर्घटनामा कमी आउने उनको भनाइ छ ।
लकडाउन भन्दा पहिलादेखि नै सुरु भएको यो परियोजनाको काम कछुवाको गतिमा हुँदा दुर्घटना सँगै धुलोले पनि इटहरीवासी आजित बनेका छन् । सडक दुर्घटना न्यूनीकरणको लागि यो काम चाँडो सक्नुपर्ने स्थानीय तथा सवारी चालक बताउँछन् ।
पछिल्लो समय इटहरीमा सवारी दुर्घटना हुने र मृत्यु हुनेको सङ्ख्या वृद्धि हुन थालेको छ । आइतबार इटहरीको हलगडामा सवारी दुर्घटनामा परेर एक जनाको मृत्यु भएको थियो । त्यस्तै इटहरीमा नै तीव्र गतिमा मोटरसाइकल कुदाउँदा बुबा छोराको मृत्यु भएको थियो । यस्तै दर्जन भन्दा बढी दुर्घटनामा परेर ५ जना भन्दा बढीको ज्यान गएको छ भने धेरै अंगंभंग भएका छन् ।
