मोरङको पूर्वी नाका हुँदै भारतदेखि अवैधरुपमा खुलेआम तस्करी हुने गरेको पाइएको छ। खुला सीमाको फाइदा उठाउँदै रंगेली नगरपालिकाको धनापट्टी, रतुवामाई नगरपालिको सिक्टी, आमतोला, धनपालथान गाउँपालिका दक्षिण क्षेत्रको मायागञ्ज र खैरबना नाकादेखि खाद्यवस्तु तस्करी हुने गरेको पाइएको हो।
सशस्त्र प्रहरीको बोर्डर आउट पोस्ट (बिओपी) रंगेलीको टोलीले शुक्रबार ठूलो परिमाणमा तस्करीको चिनीसहित ट्रक नियन्त्रण गरेको छ। सशस्त्र प्रहरीका प्रहरी निरीक्षक कमल अधिकारीको कमाण्डमा खटिएको टोलीले रंगेली-५ धनापट्टी टोलबाट भारतदेखि तस्करी गरी ल्याएको चिनी र खाद्यवस्तु बरामद गरेको हो।
सशस्त्र प्रहरीले को १ ख ४४०० नम्बरको मिनी ट्रकमा लोड गरी ल्याएको चिनीको एक दर्जन बोरा, धान ६४ बोरा, २/२ बोरा चामल र गहुँ बिलबिजक नभएको बरामद गरेको जनाएको छ। सशस्त्र प्रहरीका अनुसार तस्करीमा लागेका गिरोहले अवैध रूपमा भारतदेखि चिनी र खाद्यवस्तु धनापट्टीमा ल्याएर राखेका थिए।
‘तस्करले ट्रकमाथि धानको भुस राखेका थिए भने त्यसको मुनि चिनी र खाद्यवस्तु राखेको भेटियो,’ घटनास्थलमा पुगेका एक प्रहरी अधिकृतले भने। सशस्त्र प्रहरीले बरामद गरेको चिनी, खाद्यबस्तु र ट्रक आवश्यक कारवाहीको लागि भन्सार कार्यालय बुझाएको छ।
रंगेलीको चोपडा नाकादेखि यसअघि पनि सशस्त्र प्रहरीले एक ट्रयाक्टर भारततर्फ तस्करी हुन लागेको हरियो मटर बरामद गरेको थियो। प्रहरीले बरामद गरेको मटर चोपडाका व्यापारी राजेश साहको रहेको थियो।
Copyright © 2019 / 2026 - Junkirikhabar.com All rights reserved
