सुनसरीको बराहक्षेत्र नगरपालिकामा पनि ५० बेडको आइसोलेसन सञ्चालनको अन्तिम क्षणमा पुगेको छ । नगरपालिकाले ७ नम्बर वडामा रहेको सप्तकोसी बहुमुखी क्याम्पसको निर्माणाधीन नयाँ भवनमा ५० बेडको आइसोलेसन निर्माण गर्न लागेको हो । नगरमा अहिले कोरोना सङ्क्रमितको सङ्ख्या २५ पुगेको छ ।
सङ्ख्यात्मक रूपमा यो कम भए पनि परीक्षणको तुलनामा उच्च हो । अहिले सबै होम आइसोलेसनमा नै बसिरहेका छन् । उनीहरूलाई वडाध्यक्षको समन्वय नगरले आवश्यक सहजीकरण गरिरहेको छ । यहाँ बन्दै गरेको आइसोलेसनमा अहिले बेड बाहेकका धेरै काम गर्न बाँकी रहेको छ । ती आवश्यक काम सम्पन्न गरेर शनिवार देखी नै सङ्क्रमितलाई राख्ने गरी काम भइरहेको आइसोलेसनका इन्चार्ज प्रमोद यादवले जानकारी दिनुभयो । उहाँका अनुसार पहिलो चरणको कोरोना सङ्क्रमणको अवस्था भन्दा यो चरणमा बराहक्षेत्रमा तीव्र गतिमा फैलिरहेको छ । अक्सिजनसहितको बेडको लागि जिल्ला स्वास्थ्य कार्यालयले ३५ वटा र स्थानीय स्वास्थ्य केन्द्रबाट १० वटा सहयोग गर्ने उहाँले जानकारी दिनुभयो ।
अहिले यहाँ सङ्क्रमण देखिएका सबैले स्वयम कोरोना परीक्षण गराएका छन् । यसबाहेक नगरले पनि आफै स्वाब सङ्कलन गरेर पनि कोरोना परीक्षण गरिरहेको छ । गत वर्ष यस नगरले चतरा धाममा एक सय बेडको आइसोलेसन सञ्चालन गरेको थियो । तर, यो वर्ष भने सिद्धबाबा स्वयमले आइसोलेसन राख्न नदिएको नगर प्रमुख निलम खनालले जानकारी दिनुभयो । पहिलेको आइसोलेसनमा रहेका सिसी टिभी, वाई फाइ, फेन लगायतका कुनै सामान ल्याउन नदिएको जानकारी दिनुभयो ।
केही साता अघि जिल्ला प्रशासन कार्यालय सुनसरीमा भएको जिल्ला कोभिड सङ्कट व्यवस्थापन केन्द्रको बैठकमा रामधुनी नगरपालिका र यस नगरले संयुक्त रूपमा आइसोलेसन बनाउने प्रारम्भिक कुरा चलेको थियो । तर, अहिले रामधुनी र यस नगरले छुट्टाछुट्टै आइसोलेसन बनाएको छ ।।
