उर्लाबारी नगरपालिका ६ डिबीमार्गस्थित गौतम सुनचाँदी पसलका सञ्चालक राजेश भन्ने गोपाल गौतमले १२ करोड रुपैयाँ लिएर फरार भएका छन् ।
उर्लाबारीका तीन सयभन्दा बढीलाई आकर्षक ब्याज दिने प्रलोभनमा पारेर १२ करोड लिएर फरार भएको जिल्ला प्रहरी मोरङले जनाएको छ ।
गौतमले सयकडा २ रुपैयाँ ब्याज दिने सर्तमा सेवाग्राहीसँग रुपैयाँ लिएर पासबुक दिँदै आएका थिए । उनले १ लाखदेखि २० लाख रुपैयाँ ब्याजमा लिएर फरार भएको उजुरी आएकाले खोजी कार्य भइरहेको जिल्ला प्रहरी मोरङका प्रमुख एसपी सन्तोष खडकाले बताए ।
रकम लिएर गौतम फरार भएपछि गौतम पीडित पहल समूह गठन गरेर पीडितहरुले पैसा फिर्ता गराउन संघर्ष गरिरहेका छन् । पहल समितिका अध्यक्ष गजेन्द्र दंगालले बचत गरेको पैसा फिर्ता ल्याउन र दोषीलाई कारबाही गराउन स्थानीय प्रशासनदेखि जनप्रतिनिधिलगायत सरोकारवालाहरूसँग पहल गरिरहेको बताए । जिल्ला प्रहरी मोरङमा गौतमविरुद्ध ठगी मुद्दा दर्ता गराएको दंगालले बताए ।
गौतमको र उनकी पत्नीको नाममा ५२ कित्ता जग्गा पत्ता लगाएर पीडितहरुले मालपोत कार्यालयमा रोक्का गर्न लगाएको छ । गौतमको नाममा २६ र उनकी पत्नी चित्रकुमारी गौतमको नाममा २४ कित्ता विभिन्न ठाउँमा जग्गा रहेको अध्यक्ष दंगालले बताए ।
एसपी खड्काले पीडितहरूले उजुरी दिएकाले फरार भएका गौतमको खोजी कार्य र अनुसन्धान भइरहेको बताए ।
Copyright © 2019 / 2026 - Junkirikhabar.com All rights reserved
