सुनसरीको इटहरी उपमहागनरपालिकाले आज (बुधबार)देखि ५० बेडको आइसोलेसन सञ्चालनमा ल्याएको छ । गत वर्ष १०० बेड आइसोलेसन सञ्चालन गरेको उपमहानगरले यो वर्ष भने ५० बेडको मात्रै आइसोलेसन सञ्चालन गरेको हो । उपमहानगरले ९ नम्बर वडामा रहेको रंगशालामा आइसोलेसन सञ्चालन गरेको हो ।
केहि समय अगाडि नै सञ्चालनको कुरा चलेको भएपनि सुरक्षा र खानाको कारण देखाउँदै उमहानगरले आइसोलेसन सञ्चालन गर्ने सकेको थिएन् । आजबाट पूर्वी पृतना हेडक्वाटर इटहरीबाट सुरक्षाकर्मी आइपुगेका छन् । यस्तै खानाको लागि उपमहागनरले सात दिनको सूचना नै निकालेको थियो । आइसोलेसन सञ्चालनको सम्पूर्ण पूर्वतयारी पुरा भएकाले आजबाट आइसोलेसन सञ्चालन गरिएको उप प्रमुख लक्ष्मी गौतमले जानकारी दिनुभयो ।
उपमहानगरले अहिले ५० बेडको आइसोलेसनमा २० बेड महिला र ३० बेड पुरुषका लागि छुट्याएको छ । यस अघि १० बेडको अक्सिजनसहितको आइसोलेसन सञ्चालन गर्ने भनेपनि उपमहानगरले अहिले २५ बेड अक्सिजन राखेको छ । यसका साथै ६ बेडको कोभिड विशेष अस्पताल पनि उपमहनगरले सञ्चालनमा ल्याएको छ । रंगशालाको पूर्व पटिको प्याराफिट मूनिको भागलाई ३ पुरुषका लागि र ३ महिलाका लागि कोभिड विशेष अस्पताल सञ्चालनमा ल्याइएको हो । आजै बाट यहाँ संक्रमितलाई राख्ने तयारी रहेको उप प्रमुख गौतमले बताउनुभयो ।
गत वर्ष कोरोना देखिएका सबैलाई आइसोलेसनमा राख्ने गरेकोमा यो वर्ष भने नगरले फरक निति अवलम्बन गरेको छ । आफ्नै घरमा होम वा सेल्फ आइसोलेसनमा बस्न सक्ने बाहेक अन्यलाई मात्रै यो आइसोलेसनमा राख्ने तयारी रहेको गौतमले बताउनुभयो ।
Copyright © 2019 / 2026 - Junkirikhabar.com All rights reserved
