अक्सिजन अभावले धेरैले ज्यान गुमाउनु परिरहेको अवस्थामा सुनसरीमा एक व्यक्तिले कोरोना सङ्क्रमितहरूको उपचारको लागि ३० थान अक्सिजन सिलिन्डर सहयोग गरेका छन् । बराहक्षेत्र ६ निवासी टेकेन्द्र कार्कीले बराहक्षेत्र नगरपालिकालाई ३० वटा अक्सिजनसहितको सिलिन्डर सहयोग गरेका हुन ।
कार्कीको बुवा श्वास प्रश्वासको बिरामी भएकै कारण निधन भएको र आमाको पनि अवस्था जटिल रहेको कारण अक्सिजन अभावकै कारण अन्यले ज्यान गुमाउन नपरोस् भन्ने उद्देश्यले सिलिन्डर सहयोग गरेको कार्कीले जानकारी दिए ।
"मेरो व्यक्तिगत सहयोग हो, अक्सिजनको अभावले अब बराहक्षेत्र नगरवासीले ज्यान गुमाउनु नपरोस्" उनले भने "यी अक्सिजनको सही सदुपयोग हुने मैले विश्वास लिएको छु ।"
कार्कीले सोमबार नगरपालिकाका मेयर निलम खनाललाई उक्त सिलिन्डर हस्तान्तरण गरेका हुन् । सिलिन्डर नगरपालिकाले सञ्चालन गरेको आइसोलेसन सेन्टरमा जडान गरिने छ । नगरप्रमुख खनालले कार्कीले गरेको सहयोगको प्रशंसा गर्दै यो सङ्कटको समयमा नगरपालिकालाई सबैले सकेको सहयोग गरिदिन आग्रह गरेका छन् ।
