कोरोना भाइरस महामारी नियन्त्रणका लागि स्थगन गरिएको हवाई उडान झण्डै दुई महिनापछि सञ्चालनमा आएको छ ।
नेपाल नागरिक उड्डयन प्राधिकरण (क्यान)ले वायुसेवा कम्पनीले दैनिक ६४ वटा आन्तरिक उडान सञ्चालन गर्नेगरी उडान तालिका बनाएको छ । कोरोना महामारीको सङ्क्रमण नियन्त्रणका लागि सरकारले वैशाख १६ गतेबाट निषेधाज्ञा लगाउँदै वैशाख २० गतेबाट आन्तरिक उडान अनिश्चितकालका लागि स्थगन गरेको थियो । त्यस्तै वैशाख २३ बाट अन्तर्राष्ट्रिय उडान पनि स्थगन गरिएका थिए ।
त्रिभुवन अन्तर्राष्ट्रिय विमानस्थलमा नियमित उडान रोकिराखेको अवस्थामा सङ्क्रमणको हालको स्थितिको मूल्याङ्कन गर्दै विमानस्थल टर्मिनलको क्षमताअनुसार भीडभाड नहुने गरी वायुसेवा कम्पनीले निषेधाज्ञाअघि सञ्चालन गरेको उडान सङ्ख्याको आधार सङ्ख्यामा १० मिनेटको अन्तरालमा उडान तालिका दिइएको छ ।
विमानस्थलका महाप्रबन्धक प्रतापबाबु तिवारीका अनुसार बुद्ध एयरलाई ३१, यति एयरलाइन्सलाई १५, श्री एयरलाइन्सलाई सात, सौर्य एयरलाइन्सलाई तीन तथा स्टकतर्फ उडान गर्ने वायुसेवाका लागि तीन÷तीन उडान स्वीकृति दिइएको छ ।
विमानस्थलले कोभिड–१९ महामारीको हालको जोखिमको स्थितिलाई ध्यानमा दिई यात्रुको सुरक्षित आवागमनका लागि नेपाल सरकार र विमानस्थलबाट जारी गरिएको स्वास्थ्यसम्बन्धी मापदण्ड÷प्रोटोकल प्रभावकारी रूपमा पालना गराउनेछ । यसका लागि सुपरिवेक्षण समितिसमेत गठन गरिएको छ ।
आन्तरिक उडानका अग्रणी वायुसेवा प्र्रदायक कम्पनी बुद्ध एयर, यती एयरलाइन्स, श्री एयरलाइन्स, सौर्य एयरलगायतले जनस्वास्थ्यको मापदण्डलाई कडाइका साथ पालना गर्दै सङ्क्रमणरहित उडानमा जुटेको जनाएका छन् ।
Copyright © 2019 / 2026 - Junkirikhabar.com All rights reserved
