असार दोस्रो सातासम्म प्रदेश १ मा समग्रमा १८ प्रतिशत क्षेत्रफलमा धान रोपाइँ भएको छ । प्रदेशमा ३ लाख ४० हजार ८ सय २९ हेक्टरमा यसपालि बर्खे धान रोपाइँ हुने अनुमान प्रदेश कृषि निर्देशनालयको छ ।
निर्देशनालयका अनुसार उच्च पहाडी क्षेत्रमा १७ प्रतिशत क्षेत्रफलमा रोपाइँ भएको छ । ताप्लेजुङमा २२, संखुवासभामा १० र सोलुखुम्बुमा ४६ प्रतिशत रोपाइँ भएको छ ।मध्य पहाडी क्षेत्रमा समग्रमा २८ प्रतिशत क्षेत्रफलमा रोपाइँ भएको छ । निर्देशनालयका अनुसार पाँचथरमा २७, इलाममा २२, भोजपुरमा ५०, तेह्रथुममा ३५, धनकुटामा १५, उदयपुरमा १२, ओखलढुंगामा ११ र खोटाङमा ३० प्रतिशत क्षेत्रफलमा रोपाइँ भएको छ ।
अन्न भण्डार मानिने तराईका मोरङ, सुनसरी र झापामा सोमबारसम्म समग्रमा १४ प्रतिशत क्षेत्रफलमा रोपाइँ भएको छ ।मोरङको ८३ हजार ३ सय हेक्टरमध्ये १२ प्रतिशत, सुनसरीको ५५ हजार हेक्टरमध्ये १३ प्रतिशत र झापाको ८७ हजार ५ सय हेक्टरमध्ये १७ प्रतिशत क्षेत्रफलमा असारको दोस्रो सातासम्ममा रोपाइँ भएको निर्देशनालयका निमित्त प्रमुख प्रकाश डाँगीले बताए । पहाडी क्षेत्रमा असारभरि र तराईमा भदौ पहिलो सातासम्म धान रोपाइँ हुने गरेको छ ।
ताप्लेजुङमा ८ हजार ७ सय ३७, संखुवासभामा १३ हजार ८ सय ५१, सोलुखुम्बुमा १ हजार ५ सय २५, पाँचथरमा ९ हजार २ सय, इलाममा १४ हजार ८ सय १५, भोजपुरमा १८ हजार, तेह्रथुममा १० हजार १ सय ७५, धनकुटामा ७ हजार ९ सय ५०, उदयपुरमा १३ हजार ३ सय, ओखलढुंगामा ४ हजार ४ सय र खोटाङमा १२ हजार ८ सय ९३ हेक्टरमा बर्खे धान रोपाइँ हुने निर्देशनालयको अनुमान छ ।
Copyright © 2019 / 2026 - Junkirikhabar.com All rights reserved
