असार १९, २०७८
जुनकिरी खबर

कोसी नदीमा जलस्तर बढ्यो

सुनसरी र सप्तरीको सीमा भएर बग्ने कोसी नदीमा जलस्तर बढेको छ । पहाडी जिल्लाहरुमा निरन्तर वर्षा भइरहेकाले बगेर आउने नदी, खोलाहरु मिसिएर कोसीमा पानी बढेको हो ।

शुक्रबार साँझ कोसी ब्यारेज भएर एक लाख ५५ हजार ९ सय ७५ क्युसेक पानी बगिरहेको नियन्त्रण कक्षले जनाएको छ । सामान्य दिनहरुमा करिब ७० हजार क्युसेक हाराहारी पानी ब्यारेज भएर बग्ने गरेको छ । पानीको बहाव बढेसँगै निकासका लागि कोसी ब्यारेजका २४ वटा ढोका खुला गरिएको नियन्त्रण कक्षले जनाएको छ ।

केही दिनदेखि पूर्वी पहाडी जिल्लाका साथै तराईमा पनि वर्षा भइरहेकाले नदी, खोलामा पानीको स्तर बढेको हो । कोसीमा जलस्तर बढे पनि तत्काल कुनै खतरा नभएको सुनसरी प्रशासनले जनाएको छ । कोसी नदीमा जलस्तर बढ्ने क्रम गत सातादेखि नै चलिरहेको छ । बिहीबार र शुक्रबार भने अलि बढी परिमाणमा पानीको बहाव भएको हो । नदीको तटीय क्षेत्रमा कुनै खतरा नरहेको उल्लेख गर्दै प्रशासनले तर सतर्कता अपनाउन भने आवश्यक रहेको जनाएको छ ।

प्रशासनले वर्षाको क्रममा निरन्तर रहे पानीको सतह अझ बढ्न सक्ने सम्भावना रहेको भन्दै सतर्कता अपनाउन सूचित गरेको छ । डेढ दशकअघि कोसीमा पानीको बहाव वृद्धि भएका बेला पूर्वी तटबन्ध भत्किएको थियो । तटबन्ध भत्किएर कोसीको पानी सुनसरीका गाउँमा सोझिंदा हजारौं घरबारविहीन बनेका थिए ।

ठूलो क्षेत्रफलको खेतीयोग्य जग्गा पुरिएको थियो भने पूर्वपश्चिम राजमार्गको करिब १३ किलोमिटर क्षेत्र क्षतिग्रस्त बनेको थियो । यसैगरी सीमापारि भारतको बिहार क्षेत्रमा पनि कोसीको बाढीले मानवीय तथा भौतिक क्षति पुगेको थियो ।