नेकपा एमालेका प्रदेश १ का १० सांसदले बुधबारबाट औपचारिक रूपमा पार्टी छाडेर नेकपा एकीकृत समाजवादीमा प्रवेश गरेका छन् ।
उनीहरुले प्रदेश १ निर्वाचन आयोगको कार्यालय विराटनगरमा पुगेर बुधबार एकीकृत समाजवादीका लागि सनाखत गराएका छन् । एकीकृत समाजवादी रोज्ने सांसदहरुमा भोजपुरका राजेन्द्र राई, खोटाङका राजन राई, मोरङका उपेन्द्र घिमिरे, कृष्ण कुमारी राई र सावित्रा रेग्मी, इलामकी खिनु लङ्वा लिम्बू, पाँचथरका गणेश काङमाङ, उदयपुरकी सुनिता चौधरी, संखुवासभाकी सरिता थापा र पदमकुमारी गुरुङ छन् ।
नेकपा एकीकृत समाजवादी मोरङका प्रवक्ता ओसिम आमलका अनुसार सबै सांसदहरुले निर्वाचन कार्यालयमा सशरीर उपस्थित भएर सनाखत गराएका छन् । सांसदहरुलाई नयाँ दल रोज्नलाई आयोगले भदौ २२ गतेसम्म सनाखत गर्ने समय दिएको थियो ।
एमालेका १० सांसदले पार्टी छाड्दै नयाँ दल रोजेपछि प्रदेश १ का मुख्यमन्त्री भीमप्रसाद आचार्य नेतृत्वको सरकार ढल्ने निश्चित देखिएको छ । एमालेका सचिव आचार्य नेतृत्वको सरकार एक सातामै अल्पमत परेको हो । उनी गत बिहीबार मात्रै प्रदेशका मुख्यमन्त्री बनेका थिए ।
एमाले छाडेर समाजवादीमा प्रवेश गरेका सांसदलाई आचार्यले एमालेमै रहन विभिन्न अफर गरेको बताइन्छ । उनले प्रदेशमा मन्त्री बनाउनेदेखि लिएर पार्टीमा महत्वपूर्ण जिम्मेवारी दिनेसम्मको प्रलोभन देखाए पनि एमालेमा रहन नसकिएको सांसद उपेन्द्र घिमिरेले बताए ।
Copyright © 2019 / 2026 - Junkirikhabar.com All rights reserved
