अल्पमतमा परेका प्रदेश १ का मुख्यमन्त्री भीम आचार्यलाई विपक्षी गठबन्धनका नेताले मार्गप्रशस्त गर्न आग्रह गरेका छन् । गत भदौ १० गते मुख्यमन्त्री बनेका आचार्यलाई मार्गप्रशस्त गर्न आग्रह गरेका हुन् ।
अल्पमतमा परे पनि मार्गप्रशस्त नगरे अविश्वासको प्रस्ताव ल्याउने प्रतिपक्षी दलहरूको तयारी छ । नेकपा माओवादी केन्द्र प्रदेश १ संसदीय दलका नेता ईन्द्रबहादुर आङ्बो अल्पमतमा परेका मुख्यमन्त्रीले तत्काल मार्गप्रशस्त गर्नुपर्ने बताउँछन् ।
राजीनामाका लागि केही दिन पर्खने बताउँदै उनले अटेर गरे बहुमत प्रक्रिया अघि बढ्ने बताए । केही दिनभित्र संसद अधिवेशन आह्वान नगरे अविश्वासको प्रस्ताव दर्ता गर्ने उनले बताए । गत भदौ ९ गते नेकपा एमाले विभाजन भएको थियो ।
बहुमत प्राप्त दलको रूपमा मुख्यमन्त्री बनेका आचार्यले सोही (भदौ ९ गते) मितिले ३० दिनभित्र संसदको फेस गर्नुपर्ने उनले बताए ।
‘संविधानको व्यवस्थाअनुसार भदौ ९ गतेको ३० दिनभित्र विश्वासको मत लिनुपर्छ,’ उनले भने, ‘विश्वासको मत नलिए बहुमत प्रक्रिया अघि बढ्छ ।’
पार्टी ९ भदौमा विभाजन भए पनि प्रदेश संसदीय दल विभाजनले २५ भदौमा वैधानिकता पाएको थियो । नेकपा एमाले २५ भदौको मितिबाट ३० दिनभित्र विश्वासको मत लिनुपर्ने बताउँछ ।
पूर्वमन्त्री तथा प्रदेश सांसद हिक्मतकुमार कार्की दसैँअघि मुख्यमन्त्रीले विश्वासको मत लिने बताउँछन् । प्रदेशमा संसदीय दल विभाजन भएको मितिले ३० दिनभित्र विश्वासको मत लिनुपर्ने बताउँदै उनले दसैँअघि नै विश्वासको मत लिने बताए ।
Copyright © 2019 / 2026 - Junkirikhabar.com All rights reserved
