भदौ ३१, २०७८
जुनकिरी खबर

धरानमा तिहार पछि मात्र विद्यालय खुल्ने

कोरोनाको उच्च जोखिम रहेकाले धरान उपमहानगरपालिका क्षेत्रमा दसैं तिहारपछि मात्र विद्यालय खोल्ने नगर कार्यपालिकाको बैठकले निर्णय गरेको छ । उपमहानगरपालिकाले असोज ४ गतेदेखि विद्यालय खोल्ने तयारी गरेको थियो ।

तर बिहीबार बसेको नगर कार्यपालिका बैठकमा वडाध्यक्षहरुले कोरोनाको उच्च जोखिम भएको र बालबालिकालाई कोरोना विरुद्धको खोप पनि नलगाइएकाले हतार गर्न नहुने अडान लिएपछि तिहार पछि मात्र विद्यालय खोल्ने निर्णय गरिएको हो ।

उपमहानगरपालिकाका वरिष्ठ प्रशासकीय अधिकृत गणेशप्रसाद खतिवडाले सरकारको स्वास्थ्य मन्त्रालयले कोरोनाको उच्च जोखिम अझै रहेको जनाउँदै स्कुल खोलीहाल्ने हतार नगर्न विज्ञप्ति जारी गरेको, संक्रामक रोग विशेषज्ञहरुले पनि बालबालिकालाई खोप नलगाइएको अवस्थामा झन् संक्रमण फैलन सक्ने चेतावनी दिएको र संक्रमण पूर्ण रुपमा अन्त्य नभएकाले दसैं-तिहार पछि मात्र खोल्ने निर्णय कार्यपालिका बैठकले गरेको बताए ।