सुनसरीको इटहरी उपमहानगरमा यातायात र बजार बन्द गराउँदै हिँड्ने नेत्रविक्रम चन्द समूहका २१ जना कार्यकर्तालाई प्रहरीले पक्राउ गरेको छ ।
मंगलबार बिहानैदेखि बजार र यातायात बन्द गराउँदै हिँडेको आरोपमा उनीहरूलाई इलाका प्रहरी कार्यालय इटहरीले नियन्त्रणमा लिएको हो ।
जिल्ला प्रशासन कार्यालय सुनसरीका प्रमुख जिल्ला अधिकारी इन्द्रदेव यादवका अनुसार बजारमा यातायात पसल बन्द गराउँदै हिँडेको पाइएपछि उनीहरूलाई नियन्त्रणमा लिइएको हो ।
उनीहरू सबैलाई इलाका प्रहरी कार्यालयको हिरासतमा राखिएको छ । प्रजिअ यादवले भने, ‘पक्राउ परेकाहरू कार्यकर्ता र विद्यार्थीजस्ता देखिएका छन् । उनीहरूलाई साँझ ५ बजेपछि छाडिने सम्भावना छ ।'
सरकारले खाना पकाउने एलपी ग्यास र पेट्रोलियम पदार्थमा गरेको मूल्यवृद्धि फिर्ता गर्नुपर्ने भन्दै चन्द नेतृत्वको माओवादीले नेपाल बन्दको आह्वान गरेको थियो । मंगलबार बिहानैदेखि पूर्वका धरान, इटहरी, इनरुवा, बिर्तामोड, दमक, विराटनगर लगायत बजार प्रभावित बनेका छन् ।
Copyright © 2019 / 2026 - Junkirikhabar.com All rights reserved
