नेपाली कांग्रेसको १४ औं महाधिवेशनअन्तर्गत प्रदेश १ को पहिलो अधिवेशन बिहीबारदेखि प्रदेश राजधानी विराटनगरमा सुरु हुँदैछ। अधिवेशन आयोजक समितिका संयोजक एवं नेपाली कांग्रेसका केन्द्रीय सदस्य कृष्णप्रसाद सिटौलाको अध्यक्षतामा बुधबार बसेको बैठकले अधिवेशन सम्बन्धी तयारी र आयोजनाबारे छलफलसमेत गरेको थियो।
विराटनगर अस्पताल नजिकको खुला मैदानलाई अधिवेशनस्थल तोकिएको छ। दिउँसो २ बजे अधिवेशन उद्घाटन हुने प्रचार समितिका संयोजक राजीव कोइरालाले जानकारी दिए। उनका अनुसार अधिवेशनका लागि विराटनगरस्थित कांग्रेस मोरङको जिल्ला पार्टी कार्यालयलाई सम्पर्क कार्यालय बनाइएको छ। अधिवेशनको उद्घाटन नेता सिटौलाले गर्ने बताइएको छ। अधिवेशनमा कांग्रेस केन्द्रीय सदस्य डा. शेखर कोइराला, केन्द्रीय सदस्य महेश आचार्य, प्रदेशका सांसद लगायतका नेताहरुको उपस्थिति रहने छ।
बिहीबार नै अधिवेशन प्रतिनिधिको नामावली यकिन गर्ने, शुक्रबार बिहान ८ देखि दिउँसो १ बजेसम्म उम्मेदवारी दर्ता गर्ने र शुक्रबार नै अन्तिम नामावली प्रकाशन गर्ने तथा चुनावको तयारी थाल्ने निर्णय बैठकमा भएको कोइरालाले बताए। उनका अनुसार प्रदेशमा पार्टीको पहिलो नेतृत्व चयनका लागि अधिवेशन उद्घाटनस्थलमै शनिबार बिहान ८ बजेदेखि मतदान प्रक्रिया सुरु हुने छ। निर्वाचनमा १ एक हजार ७ सय प्रदेश प्रतिनिधिहरुले मतदान गर्नेछन्।
कांग्रेसको प्रदेश समितिमा १ सभापति, २ उपसभापति, २ महामन्त्री, ३ सह–महामन्त्री (१ महिला)सहित, हरेक जिल्लाबाट महिला १४ र खुला १४ सदस्य, प्रत्येक निर्वाचन क्षेत्रबाट ६ महिला र १३ खुला सदस्य, खसआर्यबाट महिला ७ र खुला ५, जनजातिमा महिला ७ र खुला ८, मधेशी महिला १ र खुला १, दलित महिला १ र खुला २, थारुतर्फ महिला १ र खुला १, मुस्लिममा खुला १, अल्पसंख्यक र अपांगता भएका १ सदस्य पदका निर्वाचित हुने बताइएको छ।
Copyright © 2019 / 2026 - Junkirikhabar.com All rights reserved
