प्रदेश नं १ का मुख्यमन्त्री राजेन्द्र राईले प्रदेशको नामकरण पहिचानको आधारमा हुने धारणा व्यक्त गरेका छन् । उनले यो प्रदेशमा किरातीहरुको हक लाग्ने भन्दै प्रदेशको नाम किरातसँग सम्बन्धित हुने पनि संकेत गरे ।
किरात राई यायोक्खा जिल्ला कार्यासमिति सुनसरीको ९ औं अधिवेशनको उद्घाटन समारोहलाई शुक्रबार धरानमा सम्बोधन गर्दै प्रमुख अतिथिसमेत रहेका मुख्यमन्त्री राईले यस्तो बताएका हुन् । उनले भाषा, साँस्कृति, जातिको उपस्थितिलाई लिएर नै नाम राख्ने चलन भएको उल्लेख गर्दै प्रदेश नं १ मा आदिमकालदेखि सबैभन्दा पहिला बसोबास गर्ने र सभ्यताको शुरुवात गर्ने भएकोले किरातीहरुको हकदाबी लाग्ने पनि बताए ।
उनले मानव सभ्यताहरु नदी किनारबाट नै शुरुवात भएपनि नदीले शुरुवात गरेको नभै मानिसहरुले नै शुरुवात गरेको धारणा राखे । उनले कोशी नामकरण र कोशी सभ्यताबारे टिप्पण्ी गर्दै त्यो सभ्यताको शुरुवात पनि मानिसहरुले नै गरेको र त्यहाँका सबभन्दा पुराना मानिसहरु किराती भएको बताए । ‘किरात सबभन्दा पुरानो हो, किरात सभ्यता समृद्ध छ, शिष्ट र सँस्कारयुक्त सभ्यता छ,’उनले भने ।
Copyright © 2019 / 2026 - Junkirikhabar.com All rights reserved
