इटहरी उपमहानगरपालिकाले नगर क्षेत्रमा रहेका भुसिया कुकुर विरुद्ध निशुल्क रेबिज बिरुद्को खोप तथा बन्ध्याकरण अभियान सञ्चालन गरेको छ ।
भुसिया कुकुरको टोकाइबाट रेबिज जस्ता रोग फैलिन नदिन र शहरमा कुकुरहरूको संख्या न्यूनिकरण गर्ने उद्देश्यका साथ खोप तथा बन्ध्याकरण अभियान सञ्चालन गरिएको जनाइएको छ । अभियान ३ दिनसम्म सञ्चालन हुने इटहरी उपमहानगरपालिकाको पशुपन्छी शाखाले जनाएको छ । पशु अधिकारलाई समेत ध्यानमा राखेर पशु चिकित्सक तथा स्वयंसेवकको सहयोगमा सडकमा भेटिएका कुकुरहरूलाई बेहोस बनाएर खोप लगाउने र सुरक्षित बन्ध्याकरण गरि छाडिने उपमहानगरको योजना छ ।
साथै खोप लगाएका र बन्ध्याकरण गरिएका कुकुरहरूको निगरानी गर्न समेत पशुकर्मी परिचालन गरिने छ । इटहरीमा प्राय भुसिया कुकुरको आतंक बढी हुनेगर्छ । कुकुरको टोकाइबाट सडकमा हिड्ने यात्री तथा बालबालिकाहरू यसको जोखिममा बढी पर्ने गरेका छन् । इटहरी अस्पतालका अनुसार मासिक १३ जनासम्म कुकुरको टोकाइबाट उपचार गर्न आउने तथ्याङ्क छ ।
उपचार गर्न आउने मध्ये धेरैलाई रेबिज भएका कुकुरले टोकेको अवस्था छ । कुकुरको संख्या अत्याधिक बढेको र सोही अनुपातमा कुकुरको टोकाईबाट घाईते बुन्नेहरूको संख्या पनि बढिरहेको सम्बद्ध चिकित्सक बताउँछन्। इटहरीका सडक गल्लीमा भेटिने यस्ता कुकुरलाई उपमहानगरले नियन्त्रणमा ल्याउने कार्यको स्थानीयले स्वागत गरेका छन् । भुसिया कुकुरबाट हुने जोखिम न्यूनिकरणको लागि गरिएका यस्ता अभियानले निरन्तरता पाउनु पर्ने स्थानीय बताउँछन् ।
फागुन २० गते बाट २२ गतेसम्म सञ्चालन हुने कुकुर शिविरमा इटहरी उपमहानगर क्षेत्रका भाले र पोथी गरी करिब २०० वटा कुकुरको बन्ध्याकरण गर्ने योजन रहेको छ । नेपाल एग्री लार्ईभष्टक ट्रेनिङ एण्ड रिसर्च सेन्टरको प्राविधिक सहयोगमा भुसिया कुकुरलाई रेबिज बिरुद्को खोप तथा बन्ध्याकरण गर्ने अभियान चलाइएको हो ।
Copyright © 2019 / 2026 - Junkirikhabar.com All rights reserved
