सुनसरीको रामधुनी नगरपालिका ८ मा विपन्न समुदाय तथा बाढी पीडितहरूको लागि निर्माण गरिएको नमुना बस्ती उद्घाटन गरि हस्तान्तरण गरिएको छ ।
निजी तथा आवासीय विद्यालय अर्गनाइजेसन प्याब्सनको केन्द्रिय समितिले निर्माण गरेको नमुना बस्तीको रामधुनी नगरपालिकाका मेयर जयप्रकाश चौधरी र प्याब्सन केन्द्रिय अध्यक्ष टिकाराम पुरीले संयुक्त रुपमा उद्घाटन गर्नुभएको थियो । वडा न ८ को डुम्राहा बस्तीमा प्याब्सनले करिब १ करोडको लगानीमा निर्माण गरेको बस्तीलाई आइतबारनै रामधुनीका मेयर र उपमेयरलाई हस्तान्तरण गरिएको छ। रामधुनी नगरका प्रमुखले समेत आजै प्रतिनिधिमूलक बस्तीलाई समुदायमा हस्तान्तरण गर्नुभएको थियो ।
प्याब्सनले ड्रिम प्रोजेक्टको रुपमा लिएर अराऊँ समुदायलाई केन्द्रित गरेर बस्ती निर्माण गरेको प्याब्सन केन्द्रिय अध्यक्ष टिकाराम पुरीले जानकारी दिनुभयो । यसको संरक्षणमा नगरपालिका र समुदायले सकारात्मक साथ दिनेमा आफू विश्वस्त रहेको समेत पुरीले बताउनुभयो । कार्यक्रमका बोल्दै रामधुनी नगरपालिकाका मेयर जयप्रकाश चौधरीले प्याब्सनको उदाहरणीय काममा नगरपालिका सदैव साथ र सहयोगमा रहने बताउनुभयो ।
बस्तीमा २५ वटा घर निर्माण गरिनुको साथै बिजुली र पानीको समेत व्यवस्था गरिएको छ । साथै आगामी दिनमा बस्ती भित्र बालमैत्री पार्क समेत निर्माण गर्ने लक्ष्य राखिएको छ । कार्यक्रममा प्याब्सनका प्रदेश १ अध्यक्ष तथा बिभिन्न जिल्लाका अध्यक्ष तथा प्रतिनिधिहरूको उपस्थिति रहेको थियो ।
Copyright © 2019 / 2026 - Junkirikhabar.com All rights reserved
