इटहरीमा राष्ट्रिय युवा संघ सुनसरीको आयोजनामा लामखुट्टे विरुद्धको औषधी छिट्ने अभियान सञ्चालन गरिएको छ ।
इटहरी उपमहानगरपालिकाबाट शुरु भएको यो अभियान सुनसरीको १२ वटै स्थानीय तहमा सञ्चालन गरिने छ । युवा संघ इटहरी नगर कमिटीको सहयोगमा अहिले इटहरीका बिभिन्न वडामा रातीको समयमा औषधी छिट्ने अभियान चलिरहेको छ । इटहरीको २० नं. वडाबाट शुरु भएको अभियान अहिले ४ वटा वडामा सम्पन्न भइसकेको छ ।
गर्मी याम शुरु भएसँगै लामखुट्टेको जोखिम बढ्ने जसको कारण डेंगु जस्ता अन्य रोग नियन्त्रणको लागि अभियान सञ्चालन गरिएको युवा संघ सुनसरी अध्यक्ष सुजन डुम्जन लामाले बताउनुभयो । स्थानीय सरकारले लामखुट्टे विरुद्धको औषधी छिट्ने कामलाई निरन्तरता नदिएपछि सामाजिक उत्तरदायित्व सम्झेर आफूहरूले रात्रिकालीन समयमा औषधी छिट्ने काम गरिरहेको लामाले बताउनुभयो ।
युवा संघले अहिले इटहरीका बिभिन्न वडाका टोलहरूमा दैनिक १० देखि १२ बजेसम्म औषधी छिट्ने काम गदै आएको छ । पूर्व सूचना दिएर युवा संघले वडामा औषधी छिट्ने काम गर्ने गरेको छ । अहिलेसम्म इटहरीको २०, १९, १६ र ५ नं. वडामा युवा संघले औषधी छिट्ने काम सम्पन्न गरिसकेको छ ।
युवा संघ सुनसरीका पदाधिकारीहरूबाट उठाइएको रकमबाट औषधी छिट्ने मेसिन र औषधी खरिद गरेर अभियान सञ्चालन भइरहेको युथ फोर्स नेपाल सुनसरी प्रमुख रोशन लामाले जानकारी दिनुभयो । औषधी छिट्ने अभियान पछि आर्थिक स्थिति कमजोर भएकाहरूलाई झुल समेत वितरण गर्ने कार्यक्रम राखेको वहाँले बताउनुभयो ।
इटहरीमा पछिल्लो केही साता यता गर्मीसँगै लामखुट्टेको समस्याबाट आजित इटहरीवासीलाई राहत दिन अभियान सञ्चालन गरेको र यसमा विशुद्ध सामाजिक सेवा गर्ने उद्देश्य रहेको एमाले इटहरी नगर समिति सदस्य राजन बानियाँले बताउनुभयो । यस्ता समाजिक कार्यबाट अब आउने युवा पुस्ताहरुले सकारात्मक ज्ञान लिने वहाँको भनाई छ ।
राष्ट्रिय युवा संघ सुनसरी र इटहरी नगर कमिटीले लामखुट्टे विरुद्धको औषधी छिट्ने अभियानसँगै इटहरीका बिभिन्न वडामा निशुल्क स्वास्थ्य शिविर समेत आयोजना गदै आएको छ । शिविरमा स्त्री रोग विशेषज्ञ सेवा, हाडजोर्नी, बालरोग, फिजिसियन सेवा, नाक, कान, घाँटीको विशेषज्ञ सेवा तथा दन्त रोग विशेषज्ञ सेवा प्रदान गरिदै आएको छ ।
Copyright © 2019 / 2026 - Junkirikhabar.com All rights reserved
