स्थानीय तहको निर्वाचनको लागि इटहरीमा गठबन्धनले २५ बुँदे संकल्प पत्र सार्वजनिक गरेको छ । सुशासन र पारदर्शितालाई प्राथमिकता दिइएको संकल्प पत्र गठबन्धनका उम्मदेवार र सम्बद्ध दलका नेताहरुको उपस्थितीमा आइतबार सार्वजनिक गरिएको हो ।
संकल्पपत्रमा पूर्वाधार विकास, शिक्षा, स्वास्थ्य, रोजगारी, डुबानको समस्या समाधान, सहरी सौन्दर्यीकरण कृषि, भाषा संस्कृतिको संरक्षण, फोहोर व्यवस्थापनलाई प्राथमिकतामा राखिएको छ । इटहरीमा सबै ठाउँमा खानेपानी आपूर्तिको व्यवस्था गरिने, एक हजार स्क्वायर फिटसम्मको आवासीय क्षेत्रको घर नक्सा पास निःशुल्क पास गर्ने व्यवस्था मिलाउने, इटहरीको मुख्य बजार क्षेत्रमा स्मार्ट पार्किङको व्यवस्था गरिनेलगायतका विषयहरु संकल्प पत्रमा उल्लेख छन् ।
संकल्प पत्र सार्वजनिक गदै मेयर पदका उम्मेदवार हेमकर्ण पौडेलले सबैको साथ र सहयोगबाट इटहरीमा गठबन्धनले निर्वाचन जित्नु पर्ने बताउनुभयो ।
यस्तै संकल्प पत्रमा विद्युतीय सवारी साधनका लागि चार्जिङ स्टेसनको प्रबन्ध गरिनेछ । औद्योगिक विकास, सामाजिक विकास, महिला तथा बालबालिकाका लागि विशेष कार्यक्रम, कला साहित्य, खेलकुद, पर्यटनको विकासका निम्ति विशेष कार्यक्रम ल्याइनेछ । संकल्प पत्रमा राजस्व अभिवृद्धि र कर नीति अन्तर्गत करको दरमा पुनरावलोकन गरिने र दायरा बढाइने समेत उल्लेख छ ।
बैशाख ३० गते हुने स्थानीय तहको निर्वाचनमा इटहरीमा गठबन्धनको तर्फबाट मेयरमा नेपाली कांग्रेसका हेमकर्ण पौडेल र उपमेयरमा नेकपा एकीकृत समाजवादीका केशवकुमार विष्ट उम्मेदवार छन् ।
Copyright © 2019 / 2026 - Junkirikhabar.com All rights reserved
