सुनसरीको बराहक्षेत्र नगरपालिका–२ स्थित सप्तकोसी नदी किनारा (खयर टप्पु) बाट बुधबार बेवारिसे अवस्थामा ३ सय ५० बोरा गाँजा बरामद भएको छ । गाँजालाई ११ वटा बोराको पोका बनाइएको अवस्थामा बरामद गरिएको चतरास्थित सशस्त्र प्रहरी बलका प्रहरी निरीक्षक निगम राईले बताए । सुनसरीमा हालसम्मकै धेरै परिमाणमा गाँजा बरामद भएको यो पहिलो घटना हो ।
तस्करहरुले सर्वसाधारण र प्रहरी प्रशासन हत्तपत्त नजाने मानव बस्तीविहीन टप्पुमा राखेको अवस्थामा गाँजा बरामद भएको हो । प्रहरीले गाँजा तस्करीमा संलग्न भने पक्राउ गर्न सकेको छैन । खयर टप्पुमा ठूलो मात्रामा गाँजा बरामद भएको सशस्त्रका प्रहरी निरीक्षक राईले बताए । चतरास्थित सशस्त्र वेस क्याम्पबाट खटिएको मोबाइल गस्ती टोलीले गाँजा बरामद गरेको हो । गाँजाको मूल्य करिब ७० लाख रुपैयाँ रहेको छ ।
गाँजा धनकुटाबाट कोसीको जलमार्ग हुँदै भारतीय बजार पुर्याउने गिरोहले ल्याएको हुनसक्ने प्रहरीको अनुमान छ ।
Copyright © 2019 / 2026 - Junkirikhabar.com All rights reserved
