असार १४, २०७९
जुनकिरी खबर

इटहरीमा सयभन्दा बढी घर डुबानमा

सोमबार रातिदेखि परेको वर्षाले इटहरी उपमहानगरपालिका क्षेत्रभित्र जलमग्न भएको छ। ट्याङ्ग्रा खोला र खेतिखोलामा आएको बाढी बस्तीमा पसेपछि इटहरीका धेरैजसो स्थानमा जलमग्न भएको हो ।

यसरी मानववस्तीमा बाढी प्रवेश गर्दा स्थानीय त्रसित बनेका छन् । वर्षाले गर्दा इटहरीको मुख्य बजार क्षेत्र डुवानमा परेको छ ।

बाढीका कारण इटहरीमा मंगलबार साँझ ६ बजेसम्म सयभन्दा बढी घरमा बाढी पसेको इलाका प्रहरी कार्यालय इटहरीले जनाएको छ । खोला भरिएर बाढी बस्ती तर्फ पसेपछि स्थानियको घरमा समेत बाढी पसेको थियो । जसको कारण केही फुसका घरमा क्षति पुगेको जनाइएको छ । अझै पनि बर्षा नरोकिएका कारण बाढी पसेका स्थानियहरुलाई सुरक्षित स्थानमा रहन आग्रह गरिएको छ ।

इटहरी उपमहानगरकाका मेयर हेमकर्ण पौडेलसहित २० वटै वडाका वडाध्यक्षहरु बाढी प्रभाबित क्षेत्रमा खटिएका छन् । मेयर पौडेल नेतृत्वको टोलीले खोला थुनिएका केही स्थानहरुमा पुगेर खोला सफाइ गर्नुको साथै कटान भएका क्षेत्रमा बाध बाधिएको अवस्था छ । बर्षा केही दिनसम्म जारी रहने जल तथा पूर्वानुमान महाशाखाको रिर्पाेट अनुसार इटहरीमा विपद व्यवस्थापन समितिका जनप्रतिनिधिहरु रात दिन तयारी अवस्थामा रहेको मेयर पौडेलले जानकारी दिनुभयो ।