दशौँ अन्तर्राष्ट्रिय बालिका दिवस २०२२ को अवसरमा बराहक्षेत्रकी १८ बर्सिया गीता चौलागाई एक दिने बराहक्षेत्र नगरपालिका स्वास्थ्य शाखा प्रमुख बनाइएको छ । बिहिबार प्लान ईन्टरनेशनल नेपालको सहयोग र सामुदायिक समाज उत्थान केन्द्रको आयोजनामा 'ग्रल्र्स टेक ओभर कार्यक्रम' को लागि चौलागाईलाई एक दिने स्वास्थ्य शाखा प्रमुख बनाइएको हो । स्वास्थ्य शाखा प्रमुख नियुक्त भएपछि उनले नगरपालिकाका कर्मचारी, स्वास्थ्यकर्मी र साझेदार निकायका पदाधिकारीहरूसँग छलफल गरेकी थिइन ।
छलफलका क्रममा स्वास्थ्य शाखा प्रमुख चौलागाईलाई किशोरीहरूको समूहले किशोरीको वर्तमान अवस्था, चुनौती र स्थानीय सरकारको जिम्मेवारीको विषयमा ध्यानाकर्षण सहितको ज्ञापन पत्र बुझाएका थिए । ज्ञापन पत्र बुझ्दै उनले किशोरीहरूको समस्याको विषयमा सरोकारवाला निकायबिच छलफल गरेर उचित योजना बनाउने प्रतिबद्धता जनाएकी थिइन ।
छलफल कार्यक्रममा प्रमुख चौलागाईले स्वास्थ्य सेवा सम्बन्धी आफ्नो कार्य योजना प्रस्तुत समेत गरेकी थिइन । उनले बराहक्षेत्र नगरपालिकाको हरेक स्वास्थ्य चौकीलाई सकेसम्म किशोर किशोरी मैत्री बनाउन पहल गर्ने, एक विद्यालय एक नर्सको व्यवस्था मिलाउने लगायतका योजनाहरू प्रस्तुत गरिन् । साथै किशोर किशोरीहरुको सवालमा विभिन्न तालिमहरू समेत सञ्चालन गर्ने लगायतका योजनाहरू प्रस्तुत गदै पहिलो बैठक सम्पन्न भएको थियो ।
बैठकको अध्यक्षता गरेकी उनले एक दिनको लागि मात्र पनि स्वास्थ्य शाखा प्रमुखको जिम्मेवारी पाउँदा फरक अनुभव प्राप्त गरेको बताईन । उनले महिला अथवा बालिकाहरूले पनि नेतृत्व पाउँदा जिम्मेवारी पुरा गर्न सकिन्छ भन्ने उदाहरण आफू बन्न पाउँदा खुसी लागेको बताइन् ।
बराहक्षेत्र नगरपालिकाको स्वास्थ्य शाखा प्रमुख सुलोचना चौधरीले एक दिने ग्रल्र्स टेक ओभर कार्यक्रम सकारात्मक अभ्यास भएको बताईन । किशोरीहरूमा यस्ता कार्यक्रमले सबल र नेतृत्वदायी बनाउन ठुलो मद्दत गर्ने चौधरीको भनाई छ ।
