प्रदेश १ मा नेकपा एमाले पहिलो दल बनेको छ। तर उसले स्पष्ट बहुमत नपाउँदा सरकार गठन प्रक्रिया लम्बिने देखिन्छ। समानुपातिक सिटसहित ३९ सिट जितेको एमालेले सरकार बनाउन कम्तिमा ४७ सिट जुटाउनुपर्ने छ।
प्रदेश १ मा ५६ प्रत्यक्ष र ३७ समानुपातिकसहित ९३ सिट रहेको छ। सरकार बनाउनका लागि ४७ सिट आवश्यक पर्छ। एमालेले सरकार गठनका लागि राष्ट्रिय प्रजातान्त्रिक पार्टी (राप्रपा) र जनता समाजवादी पार्टी (जसपा)को समर्थन लिन सक्नेछन्। समानुपातिक सिटसहित राप्रपा ६ र जसपासँग एक सिटमात्र रहेको छ। सबै संख्या जोड्दा एमालेसँग ४६ सिट हुन्छ। सरकार बनाउन एमालेसँग एक सिट आवश्यक पर्ने देखिन्छ। यद्यपि समानुपातिक सिट संख्या बाँडफाँड भइसकेको छैन। एमाले नेताहरूले भने प्रदेश १ मा सरकार बनाउने दाबी गरिरहेका छन्।
यता संघमा सबैभन्दा ठूलो दल बनेको नेपाली कांग्रेस आफ्नै नेतृत्वमा सरकार बनाउने तयारीमा जुटेको छ। उसले हालकै गठबन्धन र केही साना दललाई समेत समेटेर सरकार बनाउने तयारीमा जुटेका छन्। गठबन्धनका नेताहरूले भने संघ र सातवटै प्रदेशमा सरकार बनाउने दाबी गरिरहेका छन्।
प्रदेश १ मा कांग्रेले समानुपातिक सिटसहित २९ सिट जित्ने देखिन्छ। त्यस्तै माओवादी १३ र माओवादी ४ सिट जित्ने देखिन्छ। गठबन्धनको पक्षमा समेत ४६ सिट पुग्ने देखिन्छ। समानुपातिकको एक सिट भने कुन पार्टीलाई जाने अहिलेसम्म एकीन हुन नसकेको नेताहरुले बताएका छन्।
'अहिलेसम्मको हिसाबमा एमाले र कांग्रेस नेतृत्वको गठबन्धनको सिट संख्या बराबर देखिन्छ। समानुपातिकतर्फ 'रिजर्भ' देखिएको एक सिट कुन पार्टीलाई जाने भन्ने ठम्याउन सकिएको छैन,' गठबन्धनका एक नेताले भने। निर्वाचन आयोगले सिट बाँडफाँड गरेपछि मात्र कुन पक्षमा बहुमत पुग्ने भन्ने निर्क्योल लाग्ने उनको भनाइ छ।
Copyright © 2019 / 2026 - Junkirikhabar.com All rights reserved
