सुनसरीको बराहक्षेत्र नगरपालिकाले आगामी जेठ १ गतेबाट नगरभित्र प्लास्टिकका झोला प्रयोगमा निषेध गरिएको छ ।
नगरपालिकाले फोहोर मैला व्यवस्थापन ऐन २०६८, फोहोरमैला व्यवस्थापन नियमावली २०७०, प्लास्टिक झोला नियमन तथा नियन्त्रण निर्देशिका २०६८ र बराहक्षेत्र नगरपालिकाको प्लास्टिक झोला प्रतिबन्धित सम्बन्धी निर्देशिका २०७९ ले सार्वजनिक स्वास्थ्य तथा वातावरणीय संरक्षणलाई ध्यानमा राख्दै तोकिएको मापदण्ड भन्दा कम गुणस्तरको प्लास्टिकको झोला वा ४० माइक्रोन भन्दा पातलो प्लास्टिकको झोला आयात, निर्यात, बिक्री वितरण, भण्डारण तथा प्रयोगमा रोक लगाउने भएको हो ।
२०८० सालको जेठ १ गतेबाट लागू हुने गरी ४० माइक्रोन भन्दा कमका प्लास्टिक झोलालाई प्रयोगमा रोक लगाउने नगरपालिकाले निर्णय गरेको प्रमुख प्रशासकीय अधिकृत ऋद्बिप्रकाश सिटौलाले जानकारी दिए ।
नगरपालिकाको आर्थिक वर्ष २०७९।०८० को वार्षिक नीति तथा कार्यक्रममा समेत प्लास्टिक झोला मुक्त वराहक्षेत्र नगर घोषणा गर्ने कार्यक्रम निर्धारण गरे बमोजिम २०८० जेठ १ गतेबाट गुणस्तरहीन प्लास्टिक झोला वा ४० माइक्रोन भन्दा पातलो प्लास्टिक झोला प्रयोगमा रोक लगाउने निर्णय भएको नगर प्रमुख रमेश कार्कीले बताए ।
नगरपालिकाले नगरवासीलाई अनुरोध गर्दै बिक्री वितरण गरी मौज्दात रहेका प्लास्टिक झोला जेठ १ गते अगावै उचित व्यवस्थापन गर्ने नगरबासीमा जानकारी गराएको छ ।
Copyright © 2019 / 2026 - Junkirikhabar.com All rights reserved
