एसियन हाइवेअन्तर्गत इटहरी चोकमा बन्न लागेको संरचनाको डिजाइन परिवर्तन गर्न स्थानीयहरुले माग गरेका छन् । सोमबार इटहरीका मेयर हेमकर्ण पौडेलमार्फत् सरकारको ध्यानाकर्षण गराएका हुन् । काँकडभिट्टादेखि लौकहीसम्मको सडक खण्ड विस्तारका क्रममा इटहरीमा बाँध बनाएर सडक लानेगरी बनाइएको डिजाइन परिवर्तन गरी पिल्लर सहितको फ्लाइओभर हुनुपर्ने स्थानीयहरुको माग छ । सडक विस्तार हुनु सकारात्मक कुरा भएपनि नगरको सुन्दरता, सुगमता, व्यशायीक क्रियाशीलता, पर्यटकीय महत्वमा प्रतिकुल परिस्थिती सृजना गर्ने खालको संरचना स्वीकार्य नभएको जिकिर गरिएको छ ।
इटहरीका व्यवशायी, सामाजिक संघसंस्थाका प्रतिनिधि, जनप्रतिनिधि र नागरिक समाजका अगुवाहरुले इटहरी सरकारलाई आवश्यक पहलको नेतृत्व लिन माग गरेका छन् । स्थानीयहरुको तर्फबाट अग्रज मेदिनीप्रसाद सिटौलाले मागपत्र हस्तान्तरण गरेका थिए । जवाफमा मेयर पौडेलले एसियन हाइवेअन्तर्गत इटहरी हुँदै जाने सडक इटहरीको भविष्यसँग जोडिएकोले आफूहरु गम्भीर रहेको बताएका छन् । उनले डिजाइन फेर्नको लागि इटहरी उपमहानगरपालिकाले नेतृत्व गर्ने बताएका छन् ।
गत मंसिरमै डीपीआर हात परेलगत्तै डिजाइन परिवर्तन गर्न एडीबीलाई आफूहरुले पत्र लेखेको बताउँदै उनले एडीबीले डिजाइन र डिपिआर दुवै परिवर्तन गर्न सम्भव नभएको उत्तर दिएको जानकारी दिए ।
Copyright © 2019 / 2026 - Junkirikhabar.com All rights reserved
