कोशी प्रदेशको नामाङ्कनपछि अनिश्चितकालका लागि स्थगित भएको दोस्रो प्रदेशसभाको पहिलो अधिवेशन अन्त्य भएको छ । गत फागुन १७ गते प्रदेशको नामकरणपछि सभामुख बाबुराम गौतमले अर्को सूचना जारी नभएसम्मका लागि प्रदेशसभा बैठक स्थगित गरेका थिए । ४२ दिनदेखि स्थगित भएको अधिवेशन अन्त्य भएको हो ।
प्रदेशको नाम कोशी राखेपछि पहिचान पक्षधर आन्दोलनमा छन् । आन्दोलनरत पक्षधरले प्रदेश राजधानी विराटनगर केन्द्रित आन्दोलन सुरु गरेपछि प्रदेशसभा बैठक बस्न सकेको थिएन । बुधबारको मन्त्रिपरिषदको सिफारिस पछि प्रदेश प्रमुखले अधिवेशन अन्त्य गरेका हुन् ।
सांसद बहिस्कारको अभियान सञ्चालन गरिररहेको प्रदेश १ पुन: नामाङ्कन संघर्ष समितिले प्रदेशसभा घेर्ने डरले अधिवेशन अन्त्य गरेको प्रदेश सरकार स्रोत बताउँछ ।
कोशी प्रदेशका सामाजिक विकासमन्त्री वुद्धिकुमार राजभण्डारी विजनेश नभएका कारण अधिवेशन अन्त्य भएको बताउँछन् ।
बुधबार बसेको मन्त्रिपरिषद् बैठकले स्थगित अवस्थामा रहेको प्रदेशसभा बैठक अन्त्यका लागि प्रदेश प्रमुख समक्ष सिफारिस गर्ने निर्णय गरेको थियो । प्रदेश सरकारको सिफारिस अनुसार कोशी प्रदेशका प्रदेश प्रमुख परशुराम खापुङले बुधबार राति १२ बजेदेखि लागु हुने गरी चालु अधिवेशन अन्त्य भएको निर्णय गरेका छन् ।
कोशी प्रदेशको दोस्रो प्रदेश सभाको पहिलो अधिवेशन गत २०७९ पुस १७ गते आह्वान भएको थियो । २०७९ फागुन १७ गते बसेको पहिलो अधिवेशनको १३ औं बैठकले प्रदेशको नाम कोशी राखेको थियो ।
Copyright © 2019 / 2026 - Junkirikhabar.com All rights reserved
